आमदार उत्तमराव जानकर यांच्या उपस्थितीत बक्षीस वितरण सोहळा संपन्न; युवानेते साहिल आतार यांचे भव्य आयोजन
पिसेवाडी (प्रतिनिधी: रणजितदादा गायकवाड):
रयतेचे राजे, छत्रपती शिवाजी महाराज यांच्या जयंतीनिमित्त पिसेवाडी येथे आयोजित करण्यात आलेल्या भव्य “छत्रपती चषक” दोन दिवसीय टेनिस बॉल क्रिकेट स्पर्धेचा समारोप अत्यंत उत्साहात आणि दिमाखात पार पडला. या चुरशीच्या लढतीत ‘विरविजय संघ, अकलूज’ ने उत्कृष्ट खेळाचे प्रदर्शन करत प्रथम क्रमांकाचे पारितोषिक आणि छत्रपती चषकावर आपले नाव कोरले.
साहिल आतार यांच्याकडून क्रीडा महोत्सवाचे आयोजन
युवानेते श्री. साहिल आतार (विद्यमान ग्रामपंचायत सदस्य, पिसेवाडी व कार्याध्यक्ष, ओबीसी सेल, राष्ट्रवादी काँग्रेस पार्टी – शरदचंद्र पवार, माळशिरस) आणि त्यांच्या मित्र परिवाराच्या वतीने या भव्य स्पर्धेचे आयोजन करण्यात आले होते. ग्रामीण भागातील खेळाडूंना हक्काचे व्यासपीठ मिळावे आणि युवकांमध्ये छत्रपतींच्या विचारांचा जागर व्हावा, या उद्देशाने या स्पर्धेचे नेटके नियोजन करण्यात आले होते.
दिग्गजांची उपस्थिती आणि गौरव
या स्पर्धेच्या बक्षीस वितरण समारंभाला प्रमुख पाहुणे म्हणून माळशिरस विधानसभेचे लोकप्रिय आमदार मा. श्री. उत्तमराव जानकर साहेब उपस्थित होते. त्यांच्या शुभहस्ते छत्रपती शिवाजी महाराजांच्या प्रतिमेचे पूजन करून कार्यक्रमाची सुरुवात करण्यात आली.
याप्रसंगी व्यासपीठावर श्री. पांडुरंग तात्या वाघमोडे (माजी जिल्हा नियोजन समिती सदस्य), श्री. मिलिंद सरतापे (रिपाई तालुकाध्यक्ष व जि.प. सदस्य), मा. सौ. डॉ. स्नेहलताई जीवन जानकर (विद्यमान ग्रामपंचायत सदस्य, वेळापूर), श्री. रजनीश बनसोडे (सरपंच, वेळापूर), श्री. सोमनाथ पिसे (तालुकाध्यक्ष, ओबीसी सेल), श्री. रायचंद खाडे (ग्रामपंचायत सदस्य, पिसेवाडी), मा. श्री. इलाई आतार (प्रगतशील बागायतदार), डॉ. धनंजय म्हेत्रे यांसह माळशिरस तालुक्यातील विविध क्षेत्रांतील मान्यवर, पदाधिकारी आणि मोठ्या संख्येने क्रिकेटप्रेमी उपस्थित होते.
अंतिम सामन्यात रंगला थरार
स्पर्धेचा अंतिम सामना वीर विजय (अकलूज) विरुद्ध दत्तनगर (खंडाळी) या दोन बलाढ्य संघांमध्ये झाला. दोन्ही संघांनी शेवटच्या चेंडूपर्यंत झुंज दिली, मात्र आपल्या अष्टपैलू कामगिरीच्या जोरावर विरविजय संघाने विजेतेपदाला गवसणी घातली. दत्तनगर खंडाळी संघाला द्वितीय क्रमांकावर समाधान मानावे लागले.
🏆 विजेत्यांना मिळालेली पारितोषिके:
प्रथम क्रमांक: ₹३०,००१/- आणि आकर्षक चषक (युवानेते श्री. साहिल आतार यांच्या वतीने)
द्वितीय क्रमांक: ₹२०,००१/- आणि चषक (डॉ. धनंजय म्हेत्रे व डॉ. मिलिंद पवार यांच्या वतीने)
सामाजिक संदेश आणि एकता
“ही स्पर्धा केवळ हार-जितपुरती मर्यादित नसून, युवकांमध्ये स्वाभिमान, संघटन आणि क्रीडाभावना वाढीस लावणारी ठरली आहे. शौर्य आणि स्वाभिमानाचा छत्रपतींचा संदेश प्रत्येकापर्यंत पोहोचवणे हाच या आयोजनामागचा मूळ उद्देश आहे,” असे मत आयोजक साहिल आतार यांनी व्यक्त केले.
पिसेवाडी ग्रामस्थ आणि माळशिरस तालुक्यातील क्रिकेट चाहत्यांनी या स्पर्धेला दिलेला प्रतिसाद पाहून क्रीडा क्षेत्रात आनंदाचे वातावरण पसरले आहे.
शौर्य, स्वाभिमान आणि संघटन — हाच छत्रपतींचा संदेश!
