माळशिरस लाच प्रकरणात नवा ‘ट्विस्ट’; थेट बीडीओ पांढरेंच्या नावे पाच हजारांची मागणी!
माळशिरस: प्रतिनिधी गणेश इंगळे
माळशिरस पंचायत समितीमधील लाच प्रकरणाला आता एक नवे आणि धक्कादायक वळण मिळाले आहे. या प्रकरणातील मुख्य आरोपी सुंदरराव नागटिळक याने केवळ स्वतःसाठीच नाही, तर गटविकास अधिकारी (BDO) विनायक पांढरे यांच्यासाठीही ५ हजार रुपयांच्या लाचेची मागणी केल्याचे फिर्यादीत नमूद करण्यात आले आहे. या नव्या खुलाशामुळे संपूर्ण सोलापूर जिल्ह्याच्या प्रशासकीय वर्तुळात मोठी खळबळ उडाली असून, आता बीडीओ पांढरे यांच्यावर काय कारवाई होणार, याकडे सर्वांचे लक्ष लागले आहे.
नेमके प्रकरण काय?
मिळालेल्या माहितीनुसार, माळशिरस पोलिसात दाखल करण्यात आलेल्या फिर्यादीमध्ये स्पष्टपणे म्हटले आहे की, लाचखोर सुंदरराव उत्तम नागटिळक याने संबंधित कामासाठी एकूण १० हजार रुपयांची मागणी केली होती. त्यापैकी ५ हजार रुपये स्वतःसाठी आणि ५ हजार रुपये गटविकास अधिकारी पांढरे यांना देण्यासाठी हवे असल्याचे नागटिळक याने तक्रारदाराला सांगितले होते. या खळबळजनक उल्लेखामुळे आता तपासाची सुई थेट बीडीओंच्या दिशेने वळली आहे.
प्रशासक राजवटीत भ्रष्टाचार बोकाळला?
सध्या पंचायत समितीवर लोकनियुक्त पदाधिकाऱ्यांऐवजी प्रशासक राजवट आहे. सभापती आणि उपसभापतींची पदे रिक्त असल्याने अधिकाऱ्यांवर कोणाचेही नियंत्रण राहिलेले नाही. याचाच फायदा घेत काही अधिकारी आणि कर्मचारी संगनमताने भ्रष्टाचार करत असल्याची चर्चा माळशिरस तालुक्यात जोर धरू लागली आहे. “प्रशासक असल्यामुळे अधिकाऱ्यांचे चांगलेच फावले असून भ्रष्टाचार बोकाळला आहे,” अशी संतप्त भावना नागरिकांमधून व्यक्त होत आहे.
जिल्ह्याचे लक्ष कारवाईकडे
या प्रकरणात थेट बीडीओंचे नाव आल्यामुळे पोलीस आणि लाचलुचपत प्रतिबंधक विभाग आता कोणती भूमिका घेणार, याकडे माळशिरससह संपूर्ण जिल्ह्याचे लक्ष लागले आहे. या प्रकरणाचा सखोल तपास झाल्यास पंचायत समितीमधील भ्रष्टाचाराचे आणखी मोठे ‘रॅकेट’ समोर येण्याची शक्यता वर्तवण्यात येत आहे. दरम्यान, रखडलेल्या पंचायत समिती निवडणुका आणि लोकनियुक्त बॉडी कधी येणार, याचीही प्रतीक्षा आता नागरिक करत आहेत.
