अकलूज परिसरात ऐकू आला मोठा ‘धडाम’ आवाज; सोनिक बूम की काही वेगळे? पहा सविस्तर बातमी
अकलूज प्रतिनिधी:
आज अकलूज व परिसरातील नागरिकांना अचानक मोठा ‘धडाम’ असा आवाज ऐकू आल्याने काही काळ संभ्रमाचे वातावरण निर्माण झाले. अनेकांनी हा आवाज नेमका कशामुळे झाला याबाबत विविध तर्क-वितर्क लावले. मात्र, याबाबत कोणतीही अधिकृत माहिती तत्काळ उपलब्ध नसल्याने नागरिकांमध्ये उत्सुकता आणि चर्चा सुरू होती.
या घटनेची शहानिशा केल्यानंतर माळशिरस हवामान खात्याकडून हा आवाज विमानामुळे निर्माण झाल्याची माहिती देण्यात आली. प्राथमिक माहितीनुसार, हा आवाज ‘सोनिक बूम’ प्रकाराशी संबंधित असण्याची शक्यता व्यक्त करण्यात येत आहे.
अकलूज मध्ये आज दुपारच्या दरम्यान एक विमान आकाशामध्ये घिरट्या घालत होतं….त्याचा वेग ही जास्त होता.अकलूज मधील स्थानिक लोकांनी हे विमान आकाशात गिरट्या घालत असताना पाहिले पण आहे.
तज्ज्ञांच्या मते, जेव्हा एखादे विमान ध्वनीच्या वेगापेक्षा जास्त वेगाने प्रवास करते, तेव्हा हवेत निर्माण होणाऱ्या शक्तिशाली शॉक वेव्हमुळे जमिनीवर स्फोटासारखा ‘धडाम’ आवाज ऐकू येतो. यालाच ‘सोनिक बूम’ असे म्हटले जाते. अशा वेळी घरांच्या खिडक्या, दरवाजे किंवा इमारतींमध्ये कंपन जाणवू शकते.
दरम्यान, या आवाजामुळे कोणतीही जीवित किंवा वित्तहानी झाल्याची माहिती समोर आलेली नाही. मात्र, अचानक झालेल्या या घटनेमुळे नागरिकांमध्ये मोठी चर्चा रंगली होती.
अखेर अकलूज परिसरात घुमलेला हा आवाज सोनिक बूमचा होता याबाबत अधिकृत स्तरावर सविस्तर माहिती माळशिरस हवामान खात्याकडून मिळालेली आहे.
