तुकाराम मुंढेंचा धडक कारवाईचा सपाटा; अकलूजमध्ये २.४४ लाखांचे पामोलिन तेल जप्त, माळशिरसमधील दूध डेअरी बंद
FDA आयुक्तपदाचा पदभार स्वीकारल्यानंतर अवघ्या ७२ तासांत राज्यभर २५ गुन्हे दाखल; ३३ जणांना
मुंबई/अकलूज प्रतिनीधी:
अन्न व औषध प्रशासन (FDA) आयुक्त म्हणून पदभार स्वीकारल्यानंतर अवघ्या ७२ तासांत आयएएस अधिकारी तुकाराम मुंढे यांनी राज्यभर भेसळयुक्त व निकृष्ट दर्जाच्या अन्नपदार्थांविरोधात धडक मोहीम राबविली आहे. या कारवाईत राज्यभरात २५ गुन्हे दाखल करण्यात आले असून ३३ जणांना अटक करण्यात आली आहे. तसेच २७ आस्थापनांवर सील ठोकण्यात आले आहे.
या विशेष मोहिमेदरम्यान सोलापूर जिल्ह्यातील माळशिरस आणि अकलूज येथेही महत्त्वपूर्ण कारवाया करण्यात आल्या. माळशिरस तालुक्यात विनापरवाना सुरू असलेल्या ‘जय हनुमान भाईनाथ दूध डेअरी’वर छापा टाकून ती बंद करण्याचे आदेश देण्यात आले. संबंधित डेअरीकडे आवश्यक परवाने नसल्याचे तपासात निष्पन्न झाले.
तर अकलूज येथे २ लाख ४४ हजार ७०० रुपये किमतीचा संशयित पामोलिन तेलाचा साठा जप्त करण्यात आला. सदर तेलावर आवश्यक माहिती नसल्याने ‘लेबल दोष’ आढळून आला. त्यामुळे अन्न सुरक्षा व मानके अधिनियम २००६ अंतर्गत संबंधितांवर कारवाईची प्रक्रिया सुरू करण्यात आली आली.
राज्यभरातील कारवाईत एकूण २८.७८ लाख रुपयांचा संशयित व भेसळयुक्त अन्नसाठा जप्त करण्यात आला असून तो प्रयोगशाळा तपासणीसाठी पाठविण्यात आला आहे. तसेच ३४ ठिकाणी बंदी असलेल्या गुटखा व पानमसाल्याच्या विक्रीवरही कारवाई करण्यात आली.
नागरिकांच्या आरोग्याशी तडजोड करणाऱ्यांविरोधात कठोर भूमिका कायम राहणार असल्याचे स्पष्ट करताना आयुक्त तुकाराम मुंढे यांनी नागरिकांनी संशयास्पद अन्नपदार्थांची माहिती प्रशासनाला देण्याचे आवाहन केले आहे. दूध, पाणी, खाद्यतेल, खवा, पनीर, तूप, मिठाई, मसाले व इतर अन्नपदार्थांची तपासणी पुढील काळात अधिक तीव्र करण्यात येणार असल्याचे प्रशासनाने सांगितले आहे.
बॉक्स न्यूज : ७२ तासांतील प्रमुख कारवाई
- २५ गुन्हे दाखल
- ३३ जणांना अटक
- २७ आस्थापने सील
- २८.७८ लाखांचा संशयित अन्नसाठा जप्त
- ३४ ठिकाणी गुटखा-पानमसाला कारवाई
- अकलूजमध्ये २.४४ लाखांचे पामोलिन तेल जप्त
- माळशिरसमधील विनापरवाना दूध डेअरी बंद करण्यात आली.
