लाडक्या बहिणींचे पैसे रखडले; महिलांमध्ये नाराजीचा सूर
अकलूज | प्रतिनिधी
महाराष्ट्र शासनाच्या लाडक्या बहिणी योजनेअंतर्गत दरमहा मिळणाऱ्या आर्थिक मदतीचे पैसे माळशिरस तालुक्यातील अनेक गावांतील महिलांच्या खात्यावर गेल्या दोन महिन्यांपासून जमा झाले नसल्याची तक्रार समोर येत आहे. त्यामुळे लाभार्थी महिलांमध्ये नाराजीचे वातावरण निर्माण झाले आहे.
शासनाकडून दरमहा पंधराशे रुपये लाभार्थी महिलांच्या खात्यात जमा केले जातात. मात्र मार्च आणि एप्रिल महिन्याचे पैसे अद्याप अनेक महिलांच्या खात्यावर आले नसल्याचे सांगितले जात आहे. काही महिलांच्या खात्यावर अचानक पैसे जमा होणे बंद झाल्याने संभ्रमाचे वातावरण निर्माण झाले आहे.
यासंदर्भात महिलांनी बँका, सेतू कार्यालये तसेच संबंधित विभागांकडे चौकशी केली असता, आधार कार्ड लिंक, कागदपत्रांची पडताळणी किंवा इतर तांत्रिक कारणे सांगितली जात असल्याचे महिलांचे म्हणणे आहे. अनेक महिलांनी आवश्यक कागदपत्रांची पूर्तता करूनही पैसे जमा झाले नसल्याने शासनाच्या कारभाराबाबत प्रश्नचिन्ह उपस्थित केले जात आहे.
दरम्यान, योजनेबाबत शासनाकडून कोणतीही अधिकृत माहिती किंवा स्पष्टीकरण मिळाले नसल्याने महिलांमध्ये संभ्रम कायम आहे. रखडलेल्या हप्त्याचे पैसे लवकरात लवकर जमा करावेत, अशी मागणी लाभार्थी महिलांकडून होत आहे.
