अकलूज पोलिसांची मोठी कारवाई; अवैध अग्निशस्त्रांच्या तस्करीचे जाळे उघड
१७ देशी बनावटीच्या पिस्तुलांसह ४७ जिवंत काडतुसे जप्त; सहा आरोपी अटकेत, दोघे फरार
अकलूज प्रतिनिधी :
अकलूज पोलिसांनी अवैध अग्निशस्त्रांची विक्री व वाहतूक करणाऱ्या टोळीविरुद्ध मोठी कारवाई करत तब्बल १७ देशी बनावटीची पिस्तुले, ४७ जिवंत काडतुसे आणि टाटा नेक्सॉन कार असा एकूण १८ लाख ४७ हजार रुपयांचा मुद्देमाल जप्त केला आहे. या कारवाईत आतापर्यंत सहा आरोपींना अटक करण्यात आली असून दोन आरोपी फरार आहेत.
अकलूज पोलीस ठाण्यातील पोलीस हवालदार श्रीराम पोरे यांना १४ ऑगस्ट २०२६ रोजी गोपनीय बातमीदारामार्फत माहिती मिळाली की, परळीते, ता. माढा येथील विकास कैलास वजाळे हा टाटा नेक्सॉन कारमधून विनापरवाना देशी बनावटीची अग्निशस्त्रे विक्रीसाठी अकलूज-टेंभुर्णी मार्गावरून संगम परिसरात येणार आहे. ही माहिती वरिष्ठ अधिकाऱ्यांना देण्यात आल्यानंतर पोलिसांनी पथक तयार करून सापळा रचला.
त्यानुसार विकास वजाळे याला ताब्यात घेण्यात आले. त्याच्याकडून दोन पिस्तुले आणि चार जिवंत काडतुसे, तसेच टाटा नेक्सॉन कार जप्त करण्यात आली. चौकशीत त्याने ही अग्निशस्त्रे व काडतुसे विक्रीसाठी आणल्याची माहिती दिल्याचे पोलिसांनी नमूद केले आहे.
तपास पुढे नेत पोलिसांनी या शस्त्रांचा पुरवठा करणाऱ्या व्यक्तींचा शोध सुरू केला. तपासात विकास वजाळे याचा साथीदार राहुल सतीश माने याच्याकडून मोठ्या प्रमाणात पिस्तुले व जिवंत काडतुसे विक्रीसाठी घेतल्याची माहिती समोर आली. या माहितीच्या आधारे पोलिसांनी विविध ठिकाणी कारवाई केली.
दरम्यान, सोनगीर, जिल्हा धुळे येथे पोलिसांनी केलेल्या कारवाईत चार अग्निशस्त्रे आणि २५ जिवंत काडतुसे जप्त करण्यात आली. त्यानंतर अकलूज परिसरात केलेल्या तपासातून आणखी आरोपी व शस्त्रसाठ्याचा उलगडा झाला.
पोलिसांनी केलेल्या तपासानुसार आरोपींकडून वेगवेगळ्या ठिकाणी अग्निशस्त्रे विक्री करण्यात आली होती. त्यामध्ये अकोले खुर्द, ता. माढा येथील शनि भारत बनसोडे, करकंब येथील महादेव बाळासाहेब कोरके, चिकमहूद येथील प्रदीप पांडुरंग माने, कर्नाटकातील शिवणूर येथील विजय सदाशिव किरणगी आणि सांगोला तालुक्यातील सुमित नाना लवटे यांचा समावेश असल्याचे पोलिसांनी सांगितले आहे.
यापैकी महादेव कोरके, विजय किरणगी, प्रदीप माने, शनि बनसोडे आणि सुमित लवटे यांच्याशी संबंधित ठिकाणी कारवाई करून पिस्तुले व जिवंत काडतुसे जप्त करण्यात आली. तसेच तपासादरम्यान राहुल माने याच्याकडून सहा पिस्तुले व आठ जिवंत काडतुसे जप्त करण्यात आल्याचे प्रेस नोटमध्ये नमूद आहे.
या प्रकरणातील आरोपी विकास कैलास वजाळे (३१, रा. परिते, ता. माढा), राहुल सतीश माने (३४, रा. वसंतदादा हौसिंग सोसायटी, माजी सैनिक वसाहत, मिरज), महादेव बाळासाहेब कोरके (३०, रा. कोरके वस्ती, करकंब), विजय सदाशिव किरणगी (३४, रा. शिवणूर, ता. अथणी, जि. बेळगाव, कर्नाटक), अनिल पांचलाल मेहता (३२, रा. रांजणगाव, ता. वरला, जि. बडवानी, मध्य प्रदेश) आणि सुमित नाना लवटे (१९, रा. भुईटे वस्ती, सांगोला) यांना अटक करण्यात आली आहे. प्रदीप पांडुरंग माने आणि शनि भारत बनसोडे हे दोन आरोपी फरार आहेत.
तपासादरम्यान अटक आरोपी विकास वजाळे याच्याकडून मिळालेल्या माहितीनुसार, अग्निशस्त्रांचा पुरवठा करणारा अनिल पांचलाल मेहता हा १६ ऑगस्ट रोजी सोनगीर, जिल्हा धुळे येथे अग्निशस्त्रे देण्यासाठी येणार असल्याची माहिती पोलिसांना मिळाली. त्यानुसार पोलिस पथकाने सोनगीर येथे जाऊन कारवाई केली.
या कारवाईत अवैध अग्निशस्त्रे बाळगण्याचा कोणताही वैध परवाना आरोपींकडे नसल्याचे निष्पन्न झाले. प्रकरणी भारतीय शस्त्र अधिनियमातील कलम ३, ५, २५ तसेच महाराष्ट्र पोलीस अधिनियमातील संबंधित कलमांनुसार गुन्हा दाखल करण्यात आला आहे.
अटक आरोपींना न्यायालयात हजर केले असता न्यायालयाने त्यांना २१ ऑगस्ट २०२६ पर्यंत पोलीस कोठडी रिमांड दिला आहे. या प्रकरणाचा पुढील तपास सहायक पोलीस निरीक्षक विक्रम साळुंखे करीत आहेत.
ही कारवाई पोलीस अधीक्षक अतुल कुलकर्णी, अपर पोलीस अधीक्षक विजय कबाडे, अपर पोलीस अधीक्षक पंढरपूर विभाग प्रेरणा कट्टे, उपविभागीय पोलीस अधिकारी संतोष वाळके यांच्या मार्गदर्शनाखाली करण्यात आली. अकलूज पोलीस ठाण्याचे पोलीस निरीक्षक निरज उबाळे, पोलीस निरीक्षक विक्रम साळुंखे, पोलीस निरीक्षक अंकुश वाघमोडे, पोलीस उपनिरीक्षक विशाल कदम तसेच अकलूज पोलीस व सोलापूर ग्रामीण पोलिसांच्या पथकाने ही कारवाई केली.
जिल्ह्यात अवैध अग्निशस्त्रे, शस्त्रे तसेच शरीराविरुद्धचे गुन्हे करणाऱ्या व्यक्तींविरुद्ध प्रभावी कारवाईची मोहीम सुरू ठेवण्यात येणार असल्याचे पोलिसांनी स्पष्ट केले आहे. अकलूज पोलिसांच्या या कारवाईमुळे अवैध अग्निशस्त्रांच्या विक्री-वितरणाचे जाळे उघडकीस आले असून, या प्रकरणाचा तपास अधिक खोलवर सुरू आहे.
