अकलूज परिसर धनगर समाज उन्नती मंडळाच्या वतीने पुण्यश्लोक राजमाता अहिल्यादेवी होळकर जयंती उत्सवाचे भव्य आयोजन
अकलूज प्रतिनिधी :
अकलूज परिसर धनगर समाज उन्नती मंडळाच्या वतीने पुण्यश्लोक राजमाता अहिल्यादेवी होळकर यांच्या ३०१ व्या जयंती उत्सवानिमित्त रविवार दि. ३१ मे २०२६ रोजी विविध सांस्कृतिक, सामाजिक व पारंपरिक कार्यक्रमांचे भव्य आयोजन करण्यात आले आहे. अकलूज शहरातील जुने पोलिस स्टेशन परिसरातील पुण्यश्लोक राजमाता अहिल्यादेवी होळकर स्मारक येथे हा उत्सव मोठ्या उत्साहात पार पडणार आहे.
कार्यक्रमाची सुरुवात सकाळी ९.०० वाजता मान्यवरांच्या हस्ते राजमाता अहिल्यादेवी होळकर यांच्या प्रतिमेचे पूजन करून होणार असून, यावेळी पारंपरिक गजी ढोल नृत्य सादर करण्यात येणार आहे. तसेच विविध क्षेत्रातील मान्यवरांचा सत्कार देखील करण्यात येणार आहे.
यानंतर सकाळी १०.०० वाजता महाराजा यशवंतराव होळकर जीवन गौरव पुरस्कार वितरण सोहळा आयोजित करण्यात आला आहे. समाजातील उल्लेखनीय कार्य करणाऱ्या व्यक्तींना या पुरस्काराने गौरविण्यात येणार असल्याची माहिती आयोजकांनी दिली.
सायंकाळी ६.०० वाजता भव्य मिरवणुकीचे आयोजन करण्यात आले असून, या मिरवणुकीत महाराष्ट्रातील सुप्रसिद्ध महाकाल अघोरी नृत्य सादरीकरण, पारंपरिक गजी ढोल, तसेच स्वरव्याध ढोलताशा पथक, फळटण यांचे आकर्षक सादरीकरण होणार आहे. याशिवाय अलंकार साउंड, वेळापूर यांच्याकडून ध्वनी व्यवस्थेची विशेष सजावट करण्यात येणार आहे.
“राणी असूनही वेगळी जिची छाप होती, अशी राणी अहिल्यादेवी होती” या संदेशातून राजमाता अहिल्यादेवी होळकर यांच्या कार्याचा गौरव करण्यात आला असून, सामाजिक एकोपा आणि संस्कृती जपण्याचा संदेश या उत्सवातून दिला जाणार आहे.
या जयंती उत्सवाला अकलूज व परिसरातील नागरिकांनी मोठ्या संख्येने उपस्थित राहावे, असे आवाहन अकलूज परिसर धनगर समाज उन्नती मंडळ आयोजकांकडून करण्यात आले आहे.
