स्व. पै. किरण फुके फाऊंडेशनतर्फे बागेचीवाडीत श्रमदान; दर रविवारी स्वच्छता व वृक्षारोपणाचा संकल्प
प्रतिनिधी : रणजितदादा गायकवाड
बागेचीवाडी, ता. माळशिरस : समाजासाठी कायम कार्यरत असलेले युवक पै. किरण शिवाजी फुके यांचे महिनाभरापूर्वी अकस्मात निधन झाले. त्यांच्या निधनाने संपूर्ण बागेचीवाडी गावावर शोककळा पसरली होती. मात्र, पै. किरण फुके यांचे समाजाप्रती असलेले प्रेम आणि समाजासाठी काहीतरी करण्याची निःस्वार्थ भावना कायम स्मरणात राहावी, या उद्देशाने गावातील युवकांनी **‘स्व. पै. किरण फुके फाऊंडेशन’**ची स्थापना केली आहे.
‘एक दिवस समाजासाठी’ या संकल्पनेतून फाऊंडेशनच्या वतीने बागेचीवाडी येथील जिल्हा परिषद प्राथमिक शाळेच्या आवारात श्रमदान व स्वच्छता अभियान राबविण्यात आले.
शाळेच्या परिसरात अनेक दिवसांपासून पडून असलेले दगड, विटा, फरशीचे तुकडे तसेच वाढलेली झुडपे युवकांनी श्रमदानातून हटवून परिसर स्वच्छ केला. तसेच शाळेच्या आजूबाजूला पडलेले खड्डे मुरूम व माती टाकून बुजविण्यात आले.
विशेष म्हणजे, पै. किरण फुके यांनी निधनाच्या काही दिवसांपूर्वी शाळेच्या आवारात काही औषधी वनस्पतींची लागवड केली होती. या झाडांचे संरक्षण व्हावे यासाठी फाऊंडेशनच्या माध्यमातून त्यांना ट्री गार्ड बसविण्यात आले.
यावेळी उपस्थित युवकांनी दर रविवारी गावातील विविध ठिकाणी स्वच्छता अभियान व वृक्षारोपण राबवून गाव स्वच्छ आणि सुंदर ठेवण्याचा संकल्प केला.
समाजासाठी आणि गावासाठी अशा प्रकारचे सार्वजनिक उपक्रम राबवूनच पै. किरण फुके यांना खरी श्रद्धांजली अर्पण करता येईल, अशी भावना उपस्थित युवकांनी व्यक्त केली. तसेच भविष्यात होणाऱ्या प्रत्येक स्वच्छता अभियानात उत्स्फूर्तपणे सहभागी होण्याचे सर्वांनी मान्य केले.
या उपक्रमाला बागेचीवाडी गावातील तरुणांचा मोठा आणि उत्स्फूर्त प्रतिसाद मिळाला.
