अकलूजमध्ये गर्भलिंग निदानाचा प्रयत्न; डमी ग्राहक बनलेल्या महिला पोलिसांना मारहाण
अकलूज प्रतिनिधी :
अकलूज परिसरात बेकायदेशीर गर्भलिंग निदान चाचणी करण्याच्या तयारीत असलेल्या टोळीचा पोलिसांनी रचलेला सापळा उधळण्याचा प्रयत्न झाल्याची धक्कादायक घटना समोर आली आहे. डमी ग्राहक म्हणून गेलेल्या दोन महिला पोलिसांना आरोपींनी मारहाण करून पोलिसांच्या शासकीय कामात अडथळा आणला. त्यानंतर गोंधळाचा फायदा घेत आरोपींनी घटनास्थळावरून पलायन केले. ही घटना दि. १८ रोजी दुपारी साडेबारा वाजण्याच्या सुमारास घडली.
पोलिसांना अकलूज परिसरात बेकायदेशीर गर्भलिंग निदान चाचणी केली जाणार असल्याची गोपनीय माहिती मिळाली होती. या माहितीच्या आधारे पोलिसांनी सापळा रचला. पीएसआय सोनाली मोरे आणि पोलीस हवालदार अलका कदम यांना डमी ग्राहक म्हणून कारवाईसाठी पाठविण्यात आले.
पोलिसांच्या माहितीनुसार, गर्भलिंग निदानासाठी येणाऱ्या महिलांना अकलूजमधील संग्रामनगर-नऊचारी परिसरातून वाहनाने घेऊन जाण्याची व्यवस्था करण्यात आली होती. त्यानुसार दोन्ही महिला पोलिसांना आरोपींनी वाहनातून माण तालुक्यातील पळशी (म्हसवड) येथे नेले.
पळशी येथे गर्भलिंग निदान चाचणीची तयारी सुरू असतानाच आरोपींना या दोन्ही महिला पोलिस असल्याचा संशय आला. त्यानंतर आरोपींनी त्यांच्याशी झटापट करत मारहाण केल्याचा आरोप आहे. पोलिसांनी सापळा रचल्याचे लक्षात आल्यानंतर आरोपींनी कारवाईत अडथळा निर्माण केला आणि संधी साधून घटनास्थळावरून पळ काढला.
या प्रकरणी पोलीस हवालदार अलका कदम यांच्या फिर्यादीवरून अकलूज येथील उपविभागीय पोलीस अधिकारी कार्यालयात गुन्हा दाखल करण्यात आला आहे.
या प्रकरणात महेश नंदकुमार खाडे (रा. पळशी, ता. माण), नंदकुमार खाडे यांची आई, दोन अनोळखी पुरुष आणि दोन अनोळखी महिलांचा समावेश असल्याचे पोलिसांनी सांगितले आहे.
फरार आरोपींचा शोध घेण्यासाठी पोलिसांची विविध पथके रवाना करण्यात आली आहेत. या प्रकरणाचा पुढील तपास डीवायएसपी संतोष वाळके करीत आहेत.
बेकायदेशीर गर्भलिंग निदान करणाऱ्यांसह अशा गैरकृत्यांना मदत करणाऱ्यांविरुद्ध कठोर कारवाई केली जाईल, असा इशारा अकलूजचे उपविभागीय पोलीस अधिकारी संतोष वाळके यांनी दिला आहे.
या कारवाईमुळे अकलूज परिसरात खळबळ उडाली असून, फरार आरोपींच्या शोधाकडे सर्वांचे लक्ष लागले आहे.
