‘वाघ नख’चा गौरव भारतीय नौदलात; शिवभक्तांसाठी अभिमानाचा ऐतिहासिक क्षण !

प्रतिनिधी; मालवण 

भारतीय नौदलाने ‘आयएनएस मालवण’ (INS Malvan) साठी अधिकृत बोधचिन्ह (Crest) अनावरण केले असून, हे बोधचिन्ह छत्रपती शिवाजी महाराजांच्या पराक्रमाचे प्रतीक असलेल्या ‘वाघ नख’ या ऐतिहासिक शस्त्रापासून प्रेरित आहे. ही बाब संपूर्ण महाराष्ट्रासह प्रत्येक शिवभक्तासाठी अभिमानाची आणि प्रेरणादायी ठरली आहे.

छत्रपती शिवाजी महाराजांनी स्वराज्याच्या रक्षणासाठी वापरलेले ‘वाघ नख’ हे शौर्य, चातुर्य, गुप्त हालचाल आणि निर्णायक प्रहाराचे प्रतीक मानले जाते. त्याच प्रेरणेवर आधारित भारतीय नौदलाचे हे नवे बोधचिन्ह आधुनिक सागरी सुरक्षेमध्येही शिवरायांच्या लढाऊ विचारांचा वारसा जिवंत असल्याचे अधोरेखित करते.

सागरी लाटांनी वेढलेले हे बोधचिन्ह भारताच्या सागरी सीमांच्या संरक्षणासाठी आयएनएस मालवणची दृढ बांधिलकी दर्शवते. “Silent Claws (सायलेंट क्लॉज – मूक नखे)” हे ब्रीदवाक्य धारण करणारे हे चिन्ह ‘अँटी-सबमरीन वॉरफेअर शॅलो वॉटर क्राफ्ट (ASW SWC)’च्या गुप्त हालचाली, अचूकता आणि शत्रूवर निर्णायक कारवाई करण्याच्या क्षमतेचे प्रतीक आहे.

छत्रपती शिवाजी महाराजांनी उभारलेल्या सशक्त आरमाराचा आणि सागरी सुरक्षेच्या दूरदृष्टीचा वारसा आज भारतीय नौदल आधुनिक स्वरूपात पुढे नेत असल्याचे या बोधचिन्हातून अधोरेखित होते. त्यामुळे ‘वाघ नख’ भारतीय नौदलाच्या अधिकृत बोधचिन्हात स्थान मिळणे ही प्रत्येक शिवभक्तासाठी गौरवाची, अभिमानाची आणि प्रेरणेची बाब आहे.

“शिवरायांचा पराक्रम आता भारतीय नौदलाच्या सामर्थ्याचे प्रतीक बनला आहे. ‘वाघ नख’चा हा सन्मान म्हणजे स्वराज्याच्या इतिहासाला आधुनिक भारताने दिलेली मानाची सलामी आहे.”