पत्नीशी अनैतिक संबंधांच्या संशयातून बेदम मारहाण; अकलूजमध्ये युवकाचा मृत्यू
संग्रामनगरमध्ये मारहाण प्रकरण; उपचारादरम्यान मृत्यू
अकलूज प्रतिनिधी
माळशिरस तालुक्यातील संग्रामनगर येथे पत्नीशी अनैतिक संबंध असल्याच्या संशयातून तिघांकडून करण्यात आलेल्या बेदम मारहाणीत गंभीर जखमी झालेल्या अशोक मुजमुले यांचा उपचारादरम्यान मृत्यू झाल्याची धक्कादायक घटना घडली आहे. या प्रकरणी अकलूज पोलीस ठाण्यात तिघांविरोधात खुनासह विविध कलमान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, सौ. सावित्री अशोक मुजमुले या आपल्या कुटुंबासह संग्रामनगर येथे वास्तव्यास असून त्यांचे पती अशोक मुजमुले हे वाहन चालक म्हणून काम करून कुटुंबाचा उदरनिर्वाह करत होते. दिनांक ११ मे २०२६ रोजी सायंकाळी शेजारी राहणाऱ्या नरेंद्र खैरमोडे याच्यासोबत मुलींना बोलण्याच्या कारणावरून वाद झाला होता. यावेळी नरेंद्र खैरमोडे याने अशोक मुजमुले यांना शिवीगाळ करत जीवे मारण्याची धमकी दिल्याचे त्यांनी पत्नीला सांगितले होते.
यानंतर रात्री सुमारे साडेआठच्या दरम्यान “भांडण मिटवण्यासाठी बोलावले आहे,” असे सांगून अशोक मुजमुले घराबाहेर गेले. काही वेळानंतर रात्री सुमारे ९.४५ वाजता त्यांनी पत्नी सावित्री मुजमुले यांना फोन करून ट्रेंड मॉलजवळ औदुंबरनगरकडे जाणाऱ्या रस्त्यावर नरेंद्र खैरमोडे, वैभव खैरमोडे आणि योगेश धाईंजे यांनी लाथाबुक्क्यांनी मारहाण केल्याची माहिती दिली.
घटनेनंतर सावित्री मुजमुले व त्यांची मुलगी तातडीने अकलूज पोलीस ठाण्यात दाखल झाल्या. मारहाणीनंतर अशोक मुजमुले यांच्या अंगावरील कपड्यांवर रक्ताचे डाग दिसून आल्याने त्यांना उपचारासाठी उपजिल्हा रुग्णालय, अकलूज येथे दाखल करण्यात आले.
उपचारादरम्यान अशोक मुजमुले यांनी नरेंद्र खैरमोडे हा पत्नीशी संबंध असल्याचा संशय घेत असल्याने मारहाण करण्यात आल्याचे पत्नीला सांगितले. तसेच वैभव खैरमोडे याने डोक्यात दगड मारल्याचाही आरोप त्यांनी केला होता.
दरम्यान, १२ मे रोजी पहाटे त्यांच्या प्रकृतीत अचानक बिघाड झाला. उलट्या सुरू झाल्याने त्यांना खासगी रुग्णालयात हलविण्यात आले. डॉक्टरांनी डोक्याला गंभीर दुखापत झाल्याचे सांगत पुढील उपचारासाठी सोलापूर किंवा पुणे येथे हलविण्याचा सल्ला दिला. मात्र, पुढील उपचारासाठी नेत असताना वाटेतच त्यांची प्रकृती अधिक खालावली. त्यानंतर त्यांना पुन्हा उपजिल्हा रुग्णालय, अकलूज येथे आणण्यात आले असता डॉक्टरांनी मृत घोषित केले.
या प्रकरणी सावित्री मुजमुले यांनी दिलेल्या फिर्यादीवरून नरेंद्र खैरमोडे, वैभव खैरमोडे आणि योगेश धाईंजे यांच्याविरोधात भारतीय न्याय संहिता २०२३ अंतर्गत खून, दुखापत, धमकी व संगनमताच्या कलमान्वये गुन्हा दाखल करण्यात आला आहे. पुढील तपास पोलीस उपनिरीक्षक अंकुश वाघमोडे करीत आहेत.
