“हिंदुत्वाचा भगवा घराघरात पोहोचवा” — संभाजी भिडे यांचे कार्यकर्त्यांना आवाहन
शिवरायांचा विचार घराघरात पोहोचवा — संभाजी भिडे यांचे आवाहन
चिपळूण प्रतिनिधी स्वराज्य हेर
“भगवा हा हिंदुत्वाचा आणि देशाच्या अस्मितेचा प्राण आहे. त्यामुळे हिंदुत्वाचा भगवा प्रत्येक घरापर्यंत पोहोचला पाहिजे,” असे आवाहन श्री शिवप्रतिष्ठान हिंदुस्थानचे संस्थापक अध्यक्ष संभाजी भिडे यांनी कार्यकर्त्यांना केले.
चिपळूण येथे आयोजित व्याख्यानात ते बोलत होते. या कार्यक्रमाला हिंदुत्ववादी कार्यकर्त्यांची मोठी उपस्थिती होती. आपल्या भाषणात भिडे यांनी छत्रपती शिवाजी महाराज आणि धर्मवीर संभाजी महाराज यांच्या पराक्रमाचा उल्लेख करत हिंदू समाजाने इतिहास, धर्मग्रंथ आणि संस्कृतीचे अध्ययन करणे आवश्यक असल्याचे सांगितले.
ते म्हणाले की, “शिवचरित्र, रामायण, महाभारत यांचा अभ्यास प्रत्येकाने केला पाहिजे. हिंदुत्वाचा विचार पुढील पिढीपर्यंत पोहोचवण्यासाठी कार्यकर्त्यांनी घराघरात जाऊन काम करणे गरजेचे आहे.”
कार्यक्रमादरम्यान संभाजी भिडे यांनी कार्यकर्त्यांना संघटन वाढविण्यासाठी सज्ज राहण्याचे आवाहन केले. हिंदू समाज एकत्र राहून संस्कृती आणि परंपरांचे रक्षण करेल, असा विश्वासही त्यांनी व्यक्त केला.
या व्याख्यानासाठी परिसरात पोलिसांचा चोख बंदोबस्त ठेवण्यात आला होता. कार्यक्रम शांततेत पार पडला.
