विषय समित्यांवर भाजपचे वर्चस्व; सोलापूर झेडपीत सभापतींची बिनविरोध निवड
सोलापूर प्रतिनिधी
सोलापूर जिल्हा परिषदेच्या विषय समिती सभापतीपदाच्या निवडणुकीत भाजपने पुन्हा एकदा आपले वर्चस्व सिद्ध केले असून सर्वच सभापती बिनविरोध निवडून आले आहेत. यशवंतराव चव्हाण सभागृहात पार पडलेल्या या निवडणुकीत विरोधकांनी एकही अर्ज न भरल्याने भाजपच्या उमेदवारांचा मार्ग मोकळा झाला.
समाजकल्याण समितीच्या सभापतीपदी संस्कृती सातपुते, महिला व बालकल्याण समितीच्या सभापतीपदी अमृता वाघे, तर कृषी व पशुसंवर्धन समितीच्या सभापतीपदी रामाप्पा चिवडशेट्टी यांची बिनविरोध निवड झाली. तसेच शिक्षण व आरोग्य समितीची जबाबदारी केदारसिंह सावंत यांच्याकडे सोपवण्यात आली.
निवडणूक प्रक्रिया सहाय्यक निवडणूक निर्णय अधिकारी निराळी यांच्या अध्यक्षतेखाली शांततेत पार पडली. सकाळी १० ते दुपारी १२ या वेळेत उमेदवारी अर्ज दाखल करण्यात आले. त्यानंतर छाननीत प्रत्येक पदासाठी एकच अर्ज आढळल्याने सर्व उमेदवारांची बिनविरोध निवड जाहीर करण्यात आली.
निवडणुकीपूर्वी पालकमंत्री जयकुमार गोरे यांनी भाजप जिल्हा परिषद सदस्यांची बैठक घेऊन उमेदवार निश्चित केले होते. त्यानुसार सर्वांनी अर्ज भरले आणि विरोधकांनी माघार घेतल्याने निवडणूक एकतर्फी झाली.
खातेवाटपावर उत्सुकता; काहींमध्ये नाराजी
सभापतींच्या निवडीनंतर जिल्हा परिषद अध्यक्ष दीपक वैद्य यांनी खातेवाटप जाहीर केले. उपाध्यक्ष इंद्रजीत पवार यांच्याकडे अर्थ व बांधकाम खाते सोपवण्यात आले. केदारसिंह सावंत यांना शिक्षण व आरोग्य खाते देण्यात आले, तर रामाप्पा चिवडशेट्टी यांना कृषी व पशुसंवर्धन विभाग देण्यात आला.
कृषी विभागातील अनेक योजना राज्य शासनाकडे गेल्यामुळे या खात्याबाबत चिवडशेट्टी यांच्यात काहीशी नाराजी असल्याची चर्चा आहे. उलट, केदार यांनी प्रभाव वापरून शिक्षण व आरोग्य हे महत्त्वाचे खाते मिळवल्याचे बोलले जात आहे.
पालकमंत्र्यांचा कामकाजावर भर
निवडीनंतर पालकमंत्री जयकुमार गोरे यांनी सर्व नव्या सभापतींचा सत्कार केला आणि जबाबदारीची जाणीव करून दिली. जिल्हा परिषदेत सर्वच खाती भाजपकडे असल्याने आता जनतेच्या अपेक्षांनुसार काम करण्याची गरज असल्याचे त्यांनी सांगितले.
या वेळी आमदार सचिन कल्याणशेट्टी, माजी आमदार राम सातपुते, पक्षनेत्या रश्मी बागल यांच्यासह अनेक पदाधिकारी आणि सदस्य उपस्थित होते.
शांततेत निवडणूक प्रक्रिया
निवडणूक प्रक्रिया सुरळीत पार पडावी यासाठी मुख्य कार्यकारी अधिकारी कुलदीप जंगम, अतिरिक्त मुख्य कार्यकारी अधिकारी संदीप कोहिनकर, उपमुख्य कार्यकारी अधिकारी स्मिता पाटील आणि त्यांच्या पथकाने विशेष मेहनत घेतली. कोणतीही गडबड होऊ नये म्हणून कडक पोलीस बंदोबस्त ठेवण्यात आला होता.
एकूणच, सोलापूर जिल्हा परिषदेत विषय समित्यांवरही भाजपने निर्विवाद सत्ता प्रस्थापित केली असून विरोधकांची अनुपस्थिती ठळकपणे जाणवली.
