अकलूजमध्ये ‘विराट हिंदू संमेलन’ उत्साहात पार; पारंपरिक वैभव, भक्तीमय वातावरणात भव्य सोहळा
अकलूज (प्रतिनिधी) : संपादकीय
अकलूज नगरीत सोमवारी (दि. ३० मार्च २०२६) पार पडलेले ‘विराट हिंदू संमेलन’ पारंपरिक वैभव, सांस्कृतिक दर्शन आणि भक्तीमय वातावरणामुळे विशेष ठरले. संपूर्ण कार्यक्रमात हिंदू संस्कृतीचे जिवंत चित्र उभे राहिले.
कार्यक्रमस्थळी आकर्षक सभामंडप उभारण्यात आला होता. याठिकाणी छत्रपती शिवाजी महाराज यांच्या मावळ्यांचा देखावा साकारण्यात आला होता. तसेच शिवरायांची भव्य मूर्ती आणि प्रभू श्रीराम यांची मूर्ती आकर्षणाचा केंद्रबिंदू ठरली. सभामंडप परिसरात मशाली, परमपवित्र भगवा ध्वज आणि पारंपरिक सजावटीमुळे वातावरण भारावून गेले होते.
कार्यक्रमाच्या निमित्ताने गांधी चौकातून भव्य स्वागत मिरवणूक काढण्यात आली. या मिरवणुकीत
ह.भ.प अनिल महाराज देवळेकर आणि श्रीपादतीर्थ स्वामी महाराज यांचे जिप्सीद्वारे स्वागत करण्यात आले. जय शंकर उद्यानापर्यंत ही मिरवणूक मोठ्या उत्साहात पार पडली.
जय शंकर उद्यान येथे छत्रपती शिवाजी महाराज यांना पुष्पहार अर्पण करून अभिवादन करण्यात आले, तर धर्मवीर छत्रपती संभाजी महाराज यांना हार अर्पण करून कृतज्ञता व्यक्त करण्यात आली. यानंतर शिवरायांची पालखी विजय चौकाच्या दिशेने मार्गस्थ झाली.
या पालखीत लहान वारकरी मंडळ, भगवा ध्वज, भजनी मंडळ तसेच हलगी वादकांचा सहभाग होता. पारंपरिक वाद्यांच्या गजरात आणि भक्तीमय वातावरणात पालखी विजय चौकात पोहोचली. येथे पालखी आणि महाराजांचे फुलांच्या वर्षावात भव्य स्वागत करण्यात आले. अबदागिरी, मशाली आणि भगवा ध्वजांनी सजलेले पालखीचे स्वरूप सर्वांचे लक्ष वेधून घेत होते.
विजय चौकात आगमनानंतर अनिल महाराज देवळेकर व श्रीपादतीर्थ स्वामी महाराज यांचे महिलां भगिनींनकडून पारंपरिक औक्षण करण्यात आले. औक्षणानंतर गाईचे पूजन करण्यात आले. त्यानंतर शंखनाद करण्यात आला व शिवगर्जना देत वातावरण दणाणून सोडण्यात आले.
पुढे कार्यक्रमाची प्रस्तावना सादर करत प्रमुख पाहुण्यांचा परिचय करून देण्यात आला. त्यानंतर श्रीपादतीर्थ स्वामी महाराज यांनी आशीर्वचन देत उपस्थितांना धर्म, संस्कार आणि एकतेचा संदेश दिला. यानंतर मनीष बोत्रे यांनी ‘पंच परिवर्तन’ विषयी मार्गदर्शन केले.
गौरवशाली शताब्दी वर्षांमध्ये पदार्पण यानिमित्त संघ शताब्दी विशेषांक या पुस्तकाचे प्रकाशन उपस्थित प्रमुख वक्त्यांच्या हस्ते करण्यात आले.
व सर्व हिंदू बांधवांपर्यंत हा इतिहास पोहोचावा यासाठी पुस्तक विक्री स्टॉल सुद्धा उपलब्ध करण्यात आला होता.
त्यानंतर ह.भ.प अनिल महाराज देवळेकर यांनी ‘हिंदू समाज प्रबोधन’ या विषयावर प्रभावी आणि ओजस्वी व्याख्यान देत एकता, संस्कार आणि राष्ट्रभक्तीचा संदेश दिला.
या कार्यक्रमाला विविध क्षेत्रातील प्रतिष्ठित मान्यवरांची उपस्थिती लाभली. यामध्ये डॉ. धवलसिंह प्रतापसिंह मोहिते पाटील, माळशिरस तालुक्याचे माजी आमदार रामभाऊ सातपुते, अकलूज नगर परिषदेचे उपनगराध्यक्ष शिवतेजसिंह मोहिते पाटील यांच्या धर्मपत्नी देवण्यादेवी मोहिते पाटील, व इतर सर्वच पक्षाचे प्रमुख पदाधिकारी व मान्यवर,नगरसेवक तसेच सकल हिंदू समाज संयोजक संजय एकतपुरे, श्री शिवप्रतिष्ठान हिंदुस्तान सोलापूर जिल्हा कार्यवाहक प्रताप (दादा) साळुंखे तसेच राष्ट्रीय स्वयंसेवक संघ पंढरपूर जिल्हा प्रचारक मनीष जी बोत्रे यांच्यासह सकल हिंदू समाजाचे पदाधिकारी, कार्यकारणी सदस्य व कार्यकर्ते, सर्व हिंदुत्ववादी संघटना गणेश उत्सव मंडळ, शिवजयंती मंडळ ,नवरात्र उत्सव मंडळ ,आधी संघटनेचे अध्यक्ष उपाध्यक्ष व कार्यकर्ते मोठ्या संख्येने उपस्थित होते…
कार्यक्रमाची सांगता प्रेरणा मंत्र व ध्येय मंत्राने करण्यात आली. तसेच सकल हिंदू समाजाच्या वतीने उपस्थित सर्व हिंदू बंधू-भगिनींसाठी महाप्रसादाचे आयोजन करण्यात आले होते.
एकूणच, पारंपरिक दिमाख, धार्मिकता आणि सामाजिक एकात्मतेचा संगम घडवणारे ‘विराट हिंदू संमेलन’ अकलूजमध्ये सकल हिंदू समाज च्या वतीने व सर्व कार्यकारणीच्या मेहनतीने यशस्वीरीत्या आणि अत्यंत उत्साहात पार पडले…….
हे हिंदू संमेलन यशस्वीरित्या पार पाडण्यासाठी ज्यांनी तन-मन-धन उपलब्ध करून दिले त्या सर्वांचे सकल हिंदू समाजाच्या वतीने आभार मान्यात आले…
