अकलूज नगर परिषद सभेत विकासाला गती; २६ हायमास्ट दिवे, रस्ते व पाणीप्रकल्प मंजूर
अकलूज : (प्रतिनिधी)
अकलूज नगर परिषदेची मासिक सर्वसाधारण सभा नगराध्यक्ष रेश्मा अडगळे यांच्या अध्यक्षतेखाली उत्साहात पार पडली. या सभेला उपनगराध्यक्ष शिवतेजसिंह मोहिते पाटील, मुख्याधिकारी सचिन पाटील यांच्यासह सर्व नगरसेवक उपस्थित होते.
सभेत शहराच्या सर्वांगीण विकासासाठी महत्त्वपूर्ण निर्णय घेण्यात आले. शहरातील सर्व १३ प्रभागांमध्ये प्रत्येकी दोन अशा एकूण २६ हायमास्ट दिवे बसविण्यास मंजुरी देण्यात आली असून, त्यामुळे अकलूजची प्रकाशव्यवस्था अधिक सक्षम होणार आहे.
तसेच सर्वसाधारण रस्ता अनुदानातून विविध भागांतील रस्ते विकासाला गती देण्याचा निर्णय घेण्यात आला. नगर परिषद सभागृहात सीसीटीव्ही कॅमेरे व अत्याधुनिक साऊंड सिस्टिम बसविण्यालाही मान्यता देण्यात आली.
केंद्र शासनाच्या ‘अमृत २.०’ योजनेअंतर्गत पाणीपुरवठा प्रकल्पासाठी आवश्यक जॅकवेल उभारणीसाठी ७७ मैल परिसरात नंदविजय अॅग्रो फार्मसी अँड डेव्हलपर्स प्रा. लि. तर्फे नंदिनीदेवी विजयसिंह मोहिते पाटील यांनी दहा गुंठे जागा विना मोबदला दिल्याबद्दल सभेत विशेष आभार ठराव मंजूर करण्यात आला.
याशिवाय, शहरातील प्रमुख चौकांमध्ये ट्रॅफिक सिग्नल प्रणाली बसविण्याबाबत सकारात्मक चर्चा झाली. शहीद वीर जवान हनुमंत निवृत्ती करडे यांच्या स्मरणार्थ लक्ष्मीनारायण नगरमधील अंतर्गत रस्त्यास त्यांचे नाव देण्यास मंजुरी देण्यात आली.
तसेच प्रथमाचार्य शांतिसागर महाराज यांच्या नावाने महावीर पथ ते उदयसिंह मोहिते पाटील कॉम्प्लेक्स व तेथून अकलाई आयसीयू नवीन बसस्थानकाच्या मागील रस्त्याचे नामकरण करण्यालाही मान्यता देण्यात आली.
सभेत घेतलेल्या या निर्णयांमुळे अकलूज शहराच्या विकासाला नवी चालना मिळणार असल्याची अपेक्षा व्यक्त करण्यात आली.
