धडाकेबाज कारवाई: नातेपुते खून प्रकरणातील मुख्य आरोपी २४ तासांत जेरबंद!
साताऱ्यात रचला सापळा; गुन्हे प्रकटीकरण पथकाची मोठी कामगिरी
नातेपुते (प्रतिनिधी):संपादकीय
नातेपुते परिसरात खळबळ उडवून देणाऱ्या खून प्रकरणाचा छडा लावण्यात पोलिसांना अवघ्या २४ तासांत यश आले आहे. मचकूर येथील फिर्यादीवरून नातेपुते पोलीस ठाण्यात गुन्हा दाखल झाल्यानंतर, पोलिसांनी तांत्रिक आणि गोपनीय माहितीच्या आधारे मुख्य आरोपीला सातारा जिल्ह्यातील रहीमतपूर येथून बेड्या ठोकल्या आहेत.
नेमकी घटना काय?
मचकूर येथील फिर्यादीनुसार, नातेपुते पोलीस ठाण्यात भारतीय न्याय संहिता २०२३ अंतर्गत कलम १०३, ११५ (२), ३५२, ३५१ (२), ३ (५) अन्वये गुन्हा (क्र. ९६/२०२६) नोंदवण्यात आला होता. या प्रकरणाचे गांभीर्य ओळखून पोलीस अधीक्षक अतुल कुलकर्णी, अप्पर पोलीस अधीक्षक प्रितम यावलकर आणि उपविभागीय पोलीस अधिकारी संतोष वाळके यांनी तातडीने तपासाचे आदेश दिले होते.
महिला आरोपीची कबुली आणि मुख्य आरोपीचा थरारक पाठलाग
तपासाची चक्रे फिरवत पोलिसांनी सुरुवातीला महिला आरोपी कांती विजय भोसले हिला ताब्यात घेतले. चौकशीदरम्यान तिने हा खून यया बि-या काळे याच्या मदतीने केल्याची कबुली दिली. मात्र, मुख्य आरोपी यया काळे हा घटनेनंतर फरार झाला होता.
नातेपुते पोलीस ठाण्याचे प्रभारी अधिकारी विशाल वायकर यांना गोपनीय माहिती मिळाली की, आरोपी सातारा जिल्ह्यातील रहीमतपूर येथे लपून बसला आहे. या माहितीच्या आधारे पोलिसांनी रहीमतपूर परिसरात सापळा रचून अत्यंत कौशल्यपूर्ण रीतीने पाठलाग करत आरोपीला ताब्यात घेतले.
या पथकाने केली कारवाई
ही यशस्वी कारवाई प्रभारी अधिकारी विशाल वायकर यांच्या नेतृत्वाखालील विशेष पथकाने केली. या पथकात मपोसई सोनल मोरे, सतीश पाटकुलकर, देविदास धोत्रे, रविंद्र गायकवाड, धनाजी शेळके, राकेश लोहार, सुरेश एकतपुरे, रणजित मदने, अस्लम शेख, सीमा सोनवणे, संतोष वारे, नवनाथ चव्हाण आणि सायबर शाखेचे प्रविण मेटकरी यांचा समावेश होता.
घटनेचा अधिक तपास नातेपुते पोलीस करत आहेत. अवघ्या २४ तासांत मुख्य आरोपीला अटक केल्यामुळे पोलीस दलाचे सर्वत्र कौतुक होत असून, या कारवाईमुळे गुन्हेगारांमध्ये धडकी भरली आहे.
