अकलूजमध्ये बसवेश्वर जयंतीनिमित्त भव्य रक्तदान शिबीर; ७५ रक्तदात्यांचा उत्स्फूर्त सहभाग
अकलूज (प्रतिनिधी):
वीरशैव लिंगायत समाज व महात्मा बसवेश्वर बहुउद्देशीय संस्था यांच्या संयुक्त विद्यमाने महात्मा बसवेश्वर यांच्या ८९५ व्या जयंतीनिमित्त अकलूज येथील महादेव मंदिरात भव्य रक्तदान शिबीराचे आयोजन करण्यात आले. या शिबिरात तब्बल ७५ रक्तदात्यांनी उत्स्फूर्तपणे सहभाग घेत रक्तदान केले.
या रक्तदान शिबिराचे उद्घाटन वेळापूर येथील बृहन्मठ मठाधीपती श्री.ष.ब्र.१०८ सद्गुरू सदाशिव शिवाचार्य महास्वामी यांच्या शुभहस्ते महात्मा बसवेश्वर यांच्या प्रतिमेचे पूजन व दीपप्रज्वलन करून करण्यात आले.
रक्तदान शिबिरात विशेषतः तरुणांनी मोठ्या प्रमाणात सहभाग नोंदवून सामाजिक बांधिलकी जपली. यावेळी मार्गदर्शन करताना सदाशिव शिवाचार्य महाराज म्हणाले की, “रक्तदानासारखा जीवनदायी उपक्रम समाजासाठी अत्यंत उपयुक्त आहे. अशा उपक्रमांमुळे समाजात ऐक्य वाढते आणि अनेकांचे प्राण वाचविण्यास मदत होते.”
या कार्यक्रमाला वीरशैव लिंगायत समाजाचे पदाधिकारी, महात्मा बसवेश्वर बहुउद्देशीय संस्थेचे सदस्य व नागरिक मोठ्या संख्येने उपस्थित होते.
