अकलूज येथे महाराष्ट्र डॉक्टर्स प्रीमिअर लीग २०२६ उत्साहात संपन्न…
माळशिरस प्रतिनिधी रणजितदादा गायकवाड.
अहिल्यानगर ११ संघ विजेता, पुण्याच्या डीएसपी रोडे वॉरियर्स संघाला उपविजेतेपद
अकलूज :दि.७ जाने.२०२६ रोजी सीसीएमपी होमियोपॅथिक डॉक्टर्स असोसिएशन, महाराष्ट्र राज्य व मिशन आयुर्वेदा, महाराष्ट्र राज्य यांच्या संयुक्त विद्यमाने आयोजित महाराष्ट्र डॉक्टर्स प्रीमिअर लीग, अकलूज २०२६ (पर्व ४) ही भव्य राज्यस्तरीय क्रिकेट स्पर्धा यावर्षीही मोठ्या उत्साहात व यशस्वीरीत्या क्रीडा संकुल,अकलूज येथे पार पडली. चार दिवस चाललेल्या या स्पर्धेत संपूर्ण महाराष्ट्रातून पुरुष व महिला डॉक्टरांच्या क्रिकेट संघांनी उत्स्फूर्त सहभाग नोंदवला.
या स्पर्धेत सातारा, अकलूज, माळशिरस, पुणे, बारामती, अहिल्यानगर, बीड, परभणी,मोहोळ व उमरगा येथील संघ सहभागी झाले होते. प्रत्येक सामना अत्यंत चुरशीचा व रोमांचक ठरला. खेळाडूंनी सादर केलेल्या दर्जेदार खेळामुळे प्रेक्षकांमध्ये मोठा उत्साह पाहायला मिळाला.
स्पर्धेच्या अंतिम सामन्यात अहिल्यानगर ११ संघाने उत्कृष्ट खेळाचे प्रदर्शन करत विजेतेपद पटकावले.डीएसपी रोडे वॉरियर्स, पुणे संघाने उपविजेतेपद मिळवले, तर बारामती सुपरकिंग्स संघाने तृतीय क्रमांक पटकावला तर अकलूजच्या संघाला चौथ्या स्थानावर समाधान मानावे लागले.
वैयक्तिक कामगिरीच्या आधारे मॅन ऑफ द सिरीज म्हणून डॉ. मासाळ सुरज, बेस्ट बॅट्समन डॉ. प्रमोद पवार, बेस्ट बॉलर डॉ. गुड्डू शेख, तर बेस्ट विकेट कीपर म्हणून डॉ. शकील पठाण यांना गौरविण्यात आले.
स्पर्धेचे पारितोषिक वितरण महाराष्ट्र कौन्सिल ऑफ होमिओपॅथीचे प्रशासक डॉ. बाहुबली शहा, भारतीय जनता पार्टी डॉक्टर्स सेलचे प्रदेशाध्यक्ष डॉ. बाळासाहेब हरपळे, मनसे डॉक्टर्स सेलचे प्रदेशाध्यक्ष डॉ. अजय तायडे पाटील, सुप्रसिद्ध स्त्रीरोग तज्ञ डॉ. सतीश दोशी, सुप्रसिद्ध बालरोग तज्ञ डॉ. राजीव राणे, निमाचे ज्येष्ठ नेते डॉ. तानाजी कदम, केंद्रीय निमा संघटनेचे सदस्य डॉ. मिलिंद गुळभीले, डॉ.पृथ्वीराज माने पाटील,डॉ.श्रद्धा जवंजाळ, डॉ.वैष्णवी शेटे, डॉ. प्रवीण पाटील, डॉ. उदय माने देशमुख, डॉ. दादासाहेब पराडे, होमिओपॅथीक संघटना माळशिरस तालुका अध्यक्ष डॉ. अभिजित राजे भोसले, केमिस्ट अँड ड्रगिस्ट संघटना माळशिरस तालुका अध्यक्ष विठ्ठलराव गायकवाड ,शंकर पवार, डॉ.मिलिंद हिंगमिरे,,डॉ.तुषार माने आदी मान्यवरांच्या हस्ते पार पडले.
प्रास्ताविकात आयोजन समितीचे अध्यक्ष डॉ.बाळकृष्ण गायकवाड यांनी डॉक्टरी पेशा हा नेहमी ताण तणावाचा राहिला असून डॉक्टरांनी पेशा सांभाळताना रुग्णांना फक्त सल्ले न देता स्वत व्यायामाकडे ,शरीराकडे लक्ष दिले पाहिजे याहेतूने सीसीएमपी होमियोपॅथिक डॉक्टर्स असोसिएशन व मिशन आयुर्वेद गेल्या पाच वर्षापासून ग्रामीण भागात फक्त डॉक्टरांच्या क्रिकेट सामन्याचे आयोजन करत आहे.याचबरोबर वैद्यकीय क्षेत्रातील अडीअडचणी जाणून घेऊन त्यावर उपाय योजना करण्याचे सामाजिक काम करते असे सांगितले.
महाराष्ट्र कौन्सिल ऑफ होमियोपॅथीचे प्रशासक डॉ.बाहुबली शाह यांनी सांघिक खेळ पाहून आयपीएलची आठवण आल्याचे सांगितले. तसेच व्यायामाचे महत्त्व सांगत संघटनेने केलेल्या कामाचे कौतुक करत यावर्षीपासून विजेत्या संघास द्वितीय बक्षीस देण्याचे जाहीर केले.
भाजपा डॉक्टर्स सेलचे प्रदेशाध्यक्ष डॉ.बाळासाहेब हरपळे यांनी एमडीपीएल आयोजकांचे अभिनंदन करत स्पर्धा आयोजनांमध्ये सातत्य राखत अकलूजची स्पर्धा ही राज्यस्तरीय राहिली नसून ती देशपातळीवर पोहचली असल्याचे सांगितले.
मनसे डॉक्टर्स सेलचे प्रदेशाध्यक्ष डॉ.अजय तायडे यांनी दिवसेंदिवस ही स्पर्धा अधिक जोमाने सुरू असल्याचे सांगत या वर्षी विजेत्या अहिल्यानगर संघाचा गतवर्षी पराभव झाला होता,त्यावेळी संघाचे कप्तान डॉ.शंकर वंजारी यांनी चॅलेंज दिले होते की पुढच्या वर्षी आम्ही जिकणार याची आठवण करून दिली.
तसेच डॉ.सतीश दोशी, डॉ.मिलिंद गुळभिले, डॉ.श्रद्धा जवंजाळ, डॉ.प्रवीण पाटील,निमाचे डॉ.प्रताप सोमवंशी आदीनी आपल्या मनोगतात संघटनेच्या कामाचे कौतुक करत भविष्यासाठी शुभेच्छा दिल्या.
स्पर्धेदरम्यान सर्व सहभागी संघांसाठी उत्तम भोजन व निवासाची सुसज्ज व्यवस्था करण्यात आली होती. पराभूत संघ जरी अल्प फरकाने पराभूत झाले असले, तरी त्यांच्या नेत्रदीपक कामगिरीने प्रेक्षकांची मने जिंकली.स्पर्धेत राज्यभरातून डॉक्टर्स सहभागी झाले होते तसेच या स्पर्धा युट्यूब वरून प्रसारित करण्यात आल्या होत्या.
ही स्पर्धा यशस्वी करण्यासाठी डॉ. बाळकृष्ण गायकवाड, डॉ. अनिल बळते, डॉ. हर्षवर्धन गायकवाड, डॉ. नितीन कुबेर, डॉ. प्रशांत निंबाळकर, डॉ. नागनाथ दगडे, डॉ. अनिस शेख व डॉ. फैज सय्यद , डॉ.छाया दगडे यांनी विशेष परिश्रम घेतले.
स्पर्धेत सहभागी झालेल्या सर्व डॉक्टर संघांचे आयोजकांच्या वतीने मनःपूर्वक आभार मानण्यात आले. पुढील वर्षी ही स्पर्धा अधिक भव्य व जोमाने आयोजित करण्यात येणार असल्याचे आयोजकांनी सांगितले.
