ईदगाहच्या दयनीय अवस्थेवरून प्रशासन धारेवर; कामात दिरंगाई झाल्यास तीव्र आंदोलनाचा इशारा!
अकलुज प्रतिनिधी: अमर जाधव
अकलूज: रमजान ईदचा सण अवघ्या काही दिवसांवर येऊन ठेपला असतानाही, अकलूज येथील ईदगाह परिसराची अवस्था अत्यंत दयनीय असल्याचे समोर आले आहे. या गंभीर प्रकरणाची दखल घेत अमरसिंह भैय्या देशमुख यांच्या मार्गदर्शनाखाली नगरसेवक आणि पदाधिकाऱ्यांनी नगरपरिषदेत धडक देऊन प्रशासनाला ‘अल्टीमेटम’ दिला आहे.
काल ईदगाह मैदानाची प्रत्यक्ष पाहणी केली असता, तिथे स्वच्छतेचा अभाव, उखडलेले मैदान आणि मूलभूत सुविधांची वानवा दिसून आली. सण तोंडावर असताना प्रशासनाची ही उदासीनता अत्यंत निषेधार्ह असल्याची भावना व्यक्त करण्यात आली. यासंदर्भात अकलूज नगरपरिषदेला लेखी निवेदन सादर करून, ईदपूर्वी स्वच्छता, पाणीपुरवठा, मैदान समतलीकरण आणि लाईट व्यवस्था तातडीने पूर्ण करण्याची मागणी करण्यात आली आहे.
यावेळी नगरसेवक राहुल लोंढे, महेश शिंदे, संतोष वाघमोडे, अमर शेख यांच्यासह अनेक मान्यवर उपस्थित होते. “प्रशासनाने जनतेच्या श्रद्धेशी खेळू नये, अन्यथा लोकशाही मार्गाने तीव्र आंदोलन छेडले जाईल,” असा इशारा यावेळी देण्यात आला.
