पैलवानातला पैलवान’ हरपला! माळशिरसचे युवा पैलवान,एक दिलदार व्यक्तिमत्व किरण शिवाजी फुके यांचे अकाली निधन
बागेचीवाडी | प्रतिनिधी
माळशिरस तालुक्यातील बागेचीवाडी येथील सुप्रसिद्ध पैलवान किरण शिवाजी फुके (वय ३३) यांचे हृदयविकाराच्या तीव्र झटक्याने दुःखद निधन झाले. त्यांच्या अकाली निधनाची बातमी समजताच बागेचीवाडीसह संपूर्ण माळशिरस तालुक्यात शोककळा पसरली आहे. कुस्ती क्षेत्रासह सामाजिक वर्तुळातून त्यांना भावपूर्ण श्रद्धांजली अर्पण करण्यात येत आहे.
किरण फुके हे बागेचीवाडी व परिसरात “पैलवानातला पैलवान” म्हणून ओळखले जात होते. उत्कृष्ट कुस्तीपटू म्हणून त्यांनी आपली वेगळी ओळख निर्माण केली होती. मात्र, त्यांच्या खेळातील यशाइतकीच त्यांची मनमिळावू वृत्ती, मैत्री जपण्याची सवय आणि सर्वांना आपलेसे करून घेण्याचा स्वभाव यामुळे ते सर्वांच्या मनात घर करून होते.
गावातील अनेक युवकांना व्यायाम, कुस्ती आणि निरोगी जीवनशैलीची प्रेरणा किरण फुके यांच्याकडून मिळाली. त्यांच्या मार्गदर्शनामुळे अनेक तरुण आखाड्याकडे वळले. त्यामुळे ते केवळ एक पैलवान नव्हते, तर नव्या पिढीसाठी प्रेरणादायी व्यक्तिमत्त्व होते.
त्यांच्या पश्चात आई-वडील, पत्नी, दोन मुले, भाऊ आणि बहीण असा परिवार आहे. त्यांच्या अकाली जाण्याने फुके कुटुंबावर दुःखाचा डोंगर कोसळला असून, संपूर्ण गाव हळहळ व्यक्त करत आहे.
किरण फुके यांच्या कुस्तीतील कर्तृत्वासोबतच त्यांची माणुसकी, साधेपणा आणि प्रेमळ स्वभाव कायम स्मरणात राहील. त्यांच्या निधनामुळे माळशिरस तालुक्यातील कुस्ती विश्वाची आणि सामाजिक क्षेत्राची मोठी हानी झाली आहे.
ईश्वर दिवंगत आत्म्यास चिरशांती देवो आणि त्यांच्या कुटुंबीयांना हे अपरिमित दुःख सहन करण्याची शक्ती प्रदान करो, हीच भावपूर्ण प्रार्थना.
भावपूर्ण श्रद्धांजली!
