अकलूज गुन्हे प्रकटीकरण पथकाची धडाकेबाज कामगिरी; तीन गुन्ह्यांची उकल, लाखोंचा मुद्देमाल हस्तगत
अकलूज, प्रतिनिधी : अकलूज पोलीस ठाण्याच्या गुन्हे प्रकटीकरण पथकाने सलग तीन गंभीर गुन्ह्यांची यशस्वी उकल करत आरोपींना अटक केली असून चोरी व जबरी चोरीतील लाखोंचा मुद्देमाल हस्तगत केला आहे. सीसीटीव्ही फुटेज, तांत्रिक माहिती आणि गोपनीय बातमीदारांच्या मदतीने ही कारवाई करण्यात आली.
जबरी चोरी प्रकरणातील तीन आरोपी जेरबंद
वायफळ (ता. जत, जि. सांगली) येथील फिर्यादी ३ जून २०२६ रोजी अकलूज येथील एका हॉटेलमधून जेवण करून एसटी स्थानकाकडे पायी जात असताना दोन अनोळखी इसमांनी त्यांना दुचाकीवर बसवून एसटी स्थानकाऐवजी तांबोळी वसाहत-गिरमेवस्ती परिसरातील निर्जन ठिकाणी नेले. तेथे काठीने मारहाण करून त्यांच्या खिशातील ९९ हजार ३५० रुपयांची रोख रक्कम जबरीने चोरून नेली होती.
या प्रकरणी अकलूज पोलीस ठाण्यात गुन्हा दाखल करण्यात आला होता. तपासादरम्यान सुनिल भिमराव भिंगारदिवे (रा. राऊतनगर, अकलूज), आजिनाथ नागनाथ गिरी आणि संतोष महादेव गायकवाड (दोघे रा. सराटी, ता. इंदापूर) यांना ताब्यात घेण्यात आले. चौकशीत त्यांनी गुन्ह्याची कबुली दिली. आरोपींकडून चोरीस गेलेली संपूर्ण ९९ हजार ३५० रुपयांची रक्कम तसेच गुन्ह्यात वापरलेली दुचाकी जप्त करण्यात आली.
बसस्थानकातील सोनसाखळी चोरीचा गुन्हाही उघड
अकलूज नवीन बसस्थानक परिसरात टेंभुर्णीकडे जाणाऱ्या बसमध्ये चढत असताना एका प्रवाशाच्या गळ्यातील १० ग्रॅम वजनाची सोन्याची चैन अज्ञात चोरट्याने लंपास केली होती. या गुन्ह्याचा तपास करताना पोलिसांनी सुधीर रावसाहेब कराळे (रा. धामणगाव देवी, ता. पाथर्डी) आणि शुभम गोरक्ष चव्हाण (रा. इंदिरानगर, पाथर्डी) यांना अटक केली.
आरोपींकडून ९४ हजार रुपये किंमतीची सोन्याची चैन शंभर टक्के हस्तगत करण्यात आली आहे.
माळखांबीतील सोन्याचा पत्ता हिसकावणारे आरोपी अटकेत
माळखांबी येथील एका शेतकरी महिलेकडून जनावरांसाठी चारा घेऊन जात असताना दोन अनोळखी इसमांनी पत्ता विचारण्याच्या बहाण्याने तिच्या गळ्यातील ६ ग्रॅम वजनाचे सोन्याचे मणी असलेला पत्ता हिसकावून नेला होता.
या प्रकरणाचा तपास करून पोलिसांनी बालाजी हपुमंत पवार (रा. पवारवस्ती, खेडभोसे, ता. पंढरपूर) आणि पंडीत सुभाष होळकर (रा. होळे, ता. पंढरपूर) यांना अटक केली. आरोपींकडून चोरीस गेलेला सोन्याचा पत्ता आणि गुन्ह्यात वापरलेली बजाज पल्सर मोटारसायकल जप्त करण्यात आली.
वरिष्ठांच्या मार्गदर्शनाखाली कारवाई
ही कारवाई अतुल कुलकर्णी, विजय कबाडे, संतोष वाळके आणि निरज उबाळे यांच्या मार्गदर्शनाखाली करण्यात आली.
गुन्हे प्रकटीकरण शाखेचे पोलीस उपनिरीक्षक विशाल कदम, पोलीस हवालदार शिवकुमार मदभावी, विक्रम घाटगे, विनोद साठे, सुहास क्षीरसागर, राहुल रणनवरे, विशाल पोरे, दत्तात्रय खरात, पंडीत गवळे, प्रविण काळे तसेच सायबर पोलिस ठाण्यातील प्रविण मेटकरी आणि राहुल सोनकर यांनी या कामगिरीत महत्त्वाची भूमिका बजावली.
अकलूज पोलिसांच्या या कारवाईमुळे परिसरातील गुन्हेगारांमध्ये चांगलीच खळबळ उडाली असून नागरिकांनी पोलिसांच्या कामगिरीचे स्वागत केले आहे.
