सदफ शेखची बीटीएस परीक्षेत राज्यात द्वितीय क्रमांक; इस्रो अभ्यास सहलीसाठी निवड
प्रतिनिधी : रणजितदादा गायकवाड
अकलूज येथील सदाशिवराव माने विद्यालयातील इयत्ता तिसरीची विद्यार्थिनी सदफ आलमगीर शेख हिने एजुमेट अकॅडमीतर्फे आयोजित करण्यात आलेल्या प्रतिष्ठेच्या बीटीएस (भारत टॅलेंट सर्च) परीक्षेत राज्यात द्वितीय क्रमांक पटकावत उल्लेखनीय यश संपादन केले आहे.
या स्पर्धा परीक्षेत सदफ हिने १५० पैकी १४८ गुण मिळवत राज्याच्या गुणवत्ता यादीत द्वितीय स्थान मिळवले. या उल्लेखनीय कामगिरीमुळे तिची मानाच्या इस्रो (ISRO) अभ्यास सहलीसाठी निवड झाली आहे.
या यशाबद्दल सहकार महर्षी शंकरराव मोहिते-पाटील सहकारी साखर कारखान्याचे चेअरमन तसेच आनंदयात्री शिक्षण प्रसारक मंडळाचे मार्गदर्शक श्री जयसिंह शंकरराव मोहिते-पाटील (बाळदादा) यांनी सदफचे कौतुक करून तिच्या पाठीवर शाबासकीची थाप दिली. तसेच इस्रो अभ्यास सहलीसाठी शुभेच्छा देत भविष्यात अधिक मोठी शैक्षणिक भरारी घेण्यासाठी प्रेरणादायी मार्गदर्शन केले.
अवघ्या आठव्या वर्षी, इयत्ता तिसरीत शिक्षण घेत असतानाच सदफला इस्रो अभ्यास सहलीचा मान मिळाला आहे. या अभ्यास दौऱ्यासाठी ती विमान व रेल्वेने प्रवास करून इस्रोच्या विविध प्रकल्पांचा अभ्यास करणार आहे.
या यशामागे मुख्याध्यापिका सौ. शेख मॅडम, वर्गशिक्षक श्री प्रदीप मिसाळ सर तसेच गुरु कीर्ती इन्स्टिट्यूटच्या संचालिका सौ. अर्चना लवटे (कोल्हटकर) मॅडम यांचे मोलाचे मार्गदर्शन लाभले.
सदफ ही ग्रामपंचायत अधिकारी आलमगीर शेख यांची कन्या असून तिच्या या उल्लेखनीय यशाबद्दल सर्व स्तरांतून तिच्यावर अभिनंदनाचा वर्षाव होत आहे.
