वृत्तपत्र 👆🏻 साठी वरील नंबर वर क्लिक करा
वेळापूरमध्ये पालखी मार्ग ठप्प; मराठा एल्गार
तासभर रास्ता रोको करत जरांगे-पाटील यांच्या उपोषणाला पाठिंबा
वेळापूर प्रतिनिधी — मराठा आरक्षणासह विविध मागण्यांसाठी संघर्षयोद्धा मनोज जरांगे-पाटील यांनी सुरू केलेल्या आमरण उपोषणाला पाठिंबा देण्यासाठी माळशिरस तालुका अखंड मराठा समाजाच्या वतीने रविवारी वेळापूर येथे एक तास रास्ता रोको आंदोलन करण्यात आले. सकाळी ११ ते १२ या वेळेत झालेल्या या आंदोलनामुळे पंढरपूर, इंदापूर, अकलूज आणि सांगोला मार्गावरील वाहतूक तब्बल तासभर ठप्प झाली.
माळशिरस तालुका अखंड मराठा समाजाने जरांगे-पाटील यांच्या उपोषणाच्या समर्थनार्थ सहा दिवसांचा ‘मराठा एल्गार’ पुकारला आहे. त्याचाच एक भाग म्हणून वेळापूर येथील पालखी चौक, आळंदी-पंढरपूर पालखी मार्गावरील ओव्हरब्रिज तसेच पुलाखालील चौकात रास्ता रोको करण्यात आला.
खांद्यावर भगवी उपरणी आणि हातात भगवे ध्वज घेतलेल्या आंदोलकांनी ओव्हरब्रिजवर तसेच पुलाखाली चारही बाजूंनी येणाऱ्या रस्त्यांवर ठिय्या मांडत जोरदार घोषणाबाजी केली. त्यामुळे काही काळ वाहतुकीची कोंडी निर्माण झाली.
आंदोलकांनीच सुरळीत केली वाहतूक
आंदोलनाच्या पार्श्वभूमीवर पोलिस प्रशासनाकडून चोख बंदोबस्त ठेवण्यात आला होता. निवासी नायब तहसीलदार सिद्धार्थ जावीर, मंडल अधिकारी संदीप चव्हाण, तलाठी सावता गोरे तसेच वेळापूर पोलिस ठाण्याचे प्रभारी अधिकारी आशिष कांबळे यांच्यासह प्रशासन आणि पोलिस अधिकारी उपस्थित होते.
तासभराचे आंदोलन शांततेत पार पडल्यानंतर आंदोलकांनी स्वतः पुढाकार घेत रस्त्यावरील वाहतूक सुरळीत केली.
चिमुकलीच्या हस्ते प्रशासनाला निवेदन
या आंदोलनाचे आणखी एक वैशिष्ट्य ठरले ते म्हणजे प्रशासनाला देण्यात आलेले निवेदन. अवघ्या दोन वर्षांच्या चिमुकलीच्या हस्ते आंदोलकांनी प्रशासनाला निवेदन सादर केले.
ठरलेल्या वेळेनुसार शांततेत आंदोलन आटोपते घेण्यात आले. यावेळी हातात भगवे ध्वज घेत आंदोलकांनी जोरदार घोषणाबाजी करत मनोज जरांगे-पाटील यांच्या उपोषणाला आपला पाठिंबा दर्शविला.
