फिटनेससाठी सायकलिंगची हाक; ७५ किमी राईडला उत्स्फूर्त प्रतिसाद
आरोग्य, पर्यावरण आणि उत्साह; सायकल राईडने अकलूज दुमदुमले
अकलूज प्रतिनिधी:
आरोग्यदायी जीवनशैलीसाठी सायकलिंग हा अत्यंत प्रभावी आणि गरजेचा पर्याय असून, ज्येष्ठ नागरिक मोठ्या उत्साहाने सायकलिंगकडे वळत आहेत, ही निश्चितच अभिमानाची बाब आहे. त्यांच्या प्रेरणादायी कार्यातून तरुणांनीही सायकलिंगचा स्वीकार करून निरोगी जीवनाचा मार्ग निवडावा, असे प्रभावी आवाहन आ. रणजितसिंह मोहिते-पाटील यांनी केले.
माळशिरस पंचायत समिती सभागृहात आयोजित सायकल रायडर्सच्या स्वागत समारंभात ते बोलत होते. या वेळी मदनसिंह मोहिते-पाटील, दत्तात्रय मगर, इशिता मोहिते-पाटील, रघुनाथ पांढरे यांच्यासह अनेक मान्यवरांची उपस्थिती लाभली.
जागतिक आरोग्य दिनाचे औचित्य साधत आणि खासदार धैर्यशील मोहिते-पाटील यांच्या वाढदिवसानिमित्त सायकल रायडर्स असोसिएशनतर्फे अकलूज ते अकलूज अशी सुमारे ७५ किमीची भव्य सायकल राईड आयोजित करण्यात आली होती. विजयसिंह मोहिते-पाटील क्रीडा संकुल येथून या राईडला उत्साहपूर्ण वातावरणात सुरुवात झाली.
अकलूज, माळीनगर, महाळुंग, श्रीपूर, बोरगाव, वेळापूर, माळशिरस आदी गावांतून मार्गक्रमण करताना या सायकल राईडला नागरिकांकडून ठिकठिकाणी उत्स्फूर्त प्रतिसाद मिळाला. सर्वत्र जल्लोषात स्वागत होत असल्याने सहभागी सायकल रायडर्सचा उत्साह द्विगुणित झाला.
समारोप प्रसंगी सर्व सहभागी सायकल रायडर्सना मेडल व प्रमाणपत्र देऊन गौरविण्यात आले. या उपक्रमाचे यशस्वी आयोजन सूर्यकांत भिसे, डॉ. सुभाष कोकणे, सुरेंद्र पिसे, सुधाकर सोनवणे, हर्षल सरोदे यांनी केले.
ही सायकल राईड केवळ एक क्रीडा उपक्रम न राहता, आरोग्य, पर्यावरण आणि समाजजागृतीचा प्रभावी संदेश देणारी ठरली.
