विजयसिंह मोहिते पाटील व सद्गुरु सदाशिव शिवाचार्य महास्वामीजींच्या शुभ हस्ते अकलूजमध्ये रंगणार गणेश मूर्ती प्राणप्रतिष्ठा सोहळा.
अकलूज (प्रतिनिधी): स्वराज्यहेर
अकलूज येथील शिवरत्न गणेश उत्सव मंडळ व सेवाभावी संस्थेच्या वतीने आयोजित ‘श्री गणेश मूर्ती प्राणप्रतिष्ठापना व कलशारोहण सोहळा’ येत्या शुक्रवार, दिनांक ६ रोजी अत्यंत उत्साहात संपन्न होणार आहे. या मंगलमयी सोहळ्याचा गणेश भक्तांनी मोठ्या संख्येने उपस्थित राहून लाभ घ्यावा, असे आवाहन मंडळाचे अध्यक्ष शिवतेजसिंह मोहिते पाटील यांनी केले आहे.
मान्यवरांची उपस्थिती :
हा भव्य सोहळा राज्याचे माजी उपमुख्यमंत्री विजयसिंह मोहिते पाटील व त्रिकालवंदनीय श्री सद्गुरु सदाशिव शिवाचार्य महास्वामीजी यांच्या शुभहस्ते संपन्न होणार आहे. त्यांच्या उपस्थितीमुळे या सोहळ्याला विशेष आध्यात्मिक महत्त्व प्राप्त झाले आहे.
कार्यक्रमाची रूपरेषा:
या उत्सवानिमित्त दोन दिवसांच्या विविध धार्मिक कार्यक्रमांचे नियोजन करण्यात आले आहे:
गुरुवार, दि. ५ रोजी:
सकाळी ९:३० वाजता भव्य शोभायात्रा काढण्यात येणार आहे. त्यानंतर दुपारी २ ते ५ या वेळेत गणेश स्तवन, गणेश पूजन, पुण्याहवाचन, मातृका पूजन, नक्षत्र देवतापूजन, नांदीश्राद्ध, वास्तु शुद्धीकरण, प्राण शुद्धीकरण, कंकण बंधन, जलाभिषक, जलाधिवास, धान्याधिवास, शैय्याधिवास, मुख्य देवता स्थापन, पीठ पूजन व पीठ स्थापन असे विधी पार पडतील. सायंकाळी ५:३० वाजता आरती व प्रसादाचे वाटप केले जाईल.
शुक्रवार, दि. ६ रोजी:
सकाळी ७ ते दुपारी १ या दरम्यान पिठ देवता पूजन, गणेश स्तवन, अग्नी स्थापन, अग्निपूजन, मुख्य देवता पूजन, अभिषेक, वर्णिदान, अग्निहवन, मूर्ती संस्कार हवन यांसह मुख्य मूर्ती प्रतिष्ठापना व कलशारोहण पूर्णाहूती होईल. दुपारी १ ते ४ या वेळेत महाआरती व महाप्रसादाचे आयोजन करण्यात आले आहे.
शिवरत्न गणेश उत्सव मंडळाच्या वतीने या सर्व धार्मिक कार्यक्रमांची जय्यत तयारी करण्यात आली असून, परिसरातील नागरिकांनी व गणेश भक्तांनी या सोहळ्याला उपस्थित राहून कार्यक्रमाची शोभा वाढवावी, असे आवाहन आयोजकांनी केले आहे.
