माळशिरस राज्य उत्पादन शुल्क विभागाची मोठी कारवाई; ६.३० लाखांच्या बनावट मद्यासह वाहन जप्त, दोन आरोपींना अटक

माळशिरस (प्रतिनिधी):
राज्य उत्पादन शुल्क विभाग, माळशिरस यांनी बनावट विदेशी मद्याच्या वाहतुकीवर मोठी कारवाई करत सुमारे ६ लाख ३० हजार ४८० रुपयांचा मुद्देमाल जप्त केला आहे. ७ मार्च २०२६ रोजी पानीव गावच्या हद्दीत ही धाडसी कारवाई करण्यात आली असून याप्रकरणी दोन आरोपींना अटक करण्यात आली आहे.

नेमकी घटना काय?
राज्य उत्पादन शुल्क विभागाला गुप्त बातमीदाराकडून माहिती मिळाली होती की, डोंबाळवाडी ते पानीव रोडवरून बनावट विदेशी मद्याची अवैध वाहतूक होणार आहे. या माहितीच्या आधारे निरीक्षक, राज्य उत्पादन शुल्क माळशिरस व त्यांच्या पथकाने पानीव गावच्या हद्दीत सापळा रचला. संशयास्पद हालचाली दिसताच एका चारचाकी वाहनाची तपासणी केली असता, त्यात मोठ्या प्रमाणात बनावट विदेशी मद्याचा साठा आढळून आला.

जप्त केलेला मुद्देमाल:

बनावट मद्य: १८० मिली क्षमतेच्या ‘इम्पेरिअल ब्ल्यू’ आणि ‘रॉयल स्टॅग’ व्हिस्कीच्या एकूण ७६८ बाटल्या (१३८.२४ बल्क लिटर).
मद्याची किंमत: अंदाजे १,८०,४८० रुपये.
वाहन: ४,५०,००० रुपये किमतीचे एक चारचाकी वाहन.
एकूण किंमत: ६,३०,४८० रुपये.

मार्गदर्शन व पथक:
ही कारवाई विभागीय उपायुक्त (पुणे) सागर धोमकर आणि राज्य उत्पादन शुल्क विभाग सोलापूरच्या अधिक्षक भाग्यश्री जाधव यांच्या मार्गदर्शनाखाली पार पडली.

कारवाईत सहभागी अधिकारी व कर्मचारी:
या पथकात निरीक्षक सचिन भवड, दुय्यम निरीक्षक सौरभ भोसले, बाळासो नेवसे, सहाय्यक दुय्यम निरीक्षक एस. ए. बिराजदार, तसेच जवान प्रविण पुसावळे, देविदास चौगुले, गजानन जाधव, योगेश पाटील, पराडे फडतरे आणि वाहन चालक मारुती जडगे यांचा समावेश होता.

या कारवाईमुळे अवैध मद्य विक्रेते आणि वाहतूक करणाऱ्यांचे धाबे दणाणले असून, विभागाकडून अशा प्रकारच्या कारवाया यापुढेही सुरू राहणार असल्याचे सांगण्यात आले आहे.