हर्षवर्धन सपकाळ यांच्या फोटोला जोडे मारून अकलूज भाजपचा कडाडून निषेध; शिवरायांवरील वक्तव्याने शिवप्रेमी संतप्त!
अकलूज (प्रतिनिधी): गणेश इंगळे.
काँग्रेस अध्यक्ष हर्षवर्धन सपकाळ यांनी छत्रपती शिवाजी महाराज यांच्याबद्दल केलेल्या वादग्रस्त वक्तव्याचे पडसाद आता संपूर्ण माळशिरस तालुक्यात उमटू लागले आहेत. या वक्तव्याचा निषेध करण्यासाठी आज अकलूज भारतीय जनता पार्टी आणि माळशिरस तालुका भारतीय जनता पार्टीच्या वतीने अकलूजमधील ऐतिहासिक सदुभाऊ चौक येथे ‘जोडे मारो ‘ आंदोलन करण्यात आले. यावेळी संतप्त कार्यकर्त्यांनी हर्षवर्धन सपकाळ यांच्या प्रतिमेला जोडे मारून आपला तीव्र संताप व्यक्त केला.
छत्रपती शिवाजी महाराज हे महाराष्ट्राचे आराध्य दैवत आहेत. त्यांच्याबद्दल कोणत्याही प्रकारचे चुकीचे वक्तव्य शिवप्रेमी सहन करणार नाहीत, असा पवित्रा घेत भाजप कार्यकर्त्यांनी सदुभाऊ चौक परिसर घोषणाबाजीने दणाणून सोडला. “हर्षवर्धन सपकाळ यांचा धिक्कार असो”, “काँग्रेस पक्षाचा निषेध असो “ अशा घोषणांनी भाजप कार्यकर्त्यांनी काँग्रेस अध्यक्षाचा जाहीर निषेध व्यक्त केला.
या आंदोलनाचे नेतृत्व भाजप जिल्हा संघटक सचिन शिंदे आणि अकलूज शहराध्यक्ष महादेव कावळे यांनी केले. यावेळी बोलताना नेते म्हणाले की, “काँग्रेस नेत्यांना वारंवार महापुरुषांचा अपमान करण्याची सवय लागली आहे. हर्षवर्धन सपकाळ यांनी शिवरायांबद्दल केलेले विधान हे सूर्यावर थुंकण्यासारखे आहे. त्यांनी त्वरित माफी मागावी, अन्यथा यापुढेही अधिक तीव्र आंदोलन छेडले जाईल.”
या आंदोलनात अकलूज नगरसेविका एकतपुरे मॅडम, नगरसेविका दीपाली संतोष वाघमोडे, संतोष वाघमोडे, नगरसेवक राहुल लोंढे, अक्षय वाईकर, ॲड. रवींद्र जाधव, ॲड. उदय कांबळे, श्रीकांत दोरकर, शुभम सूर्यवंशी यांच्यासह भारतीय जनता पार्टीचे अनेक पदाधिकारी, कार्यकर्ते आणि शिवप्रेमी नागरिक मोठ्या संख्येने उपस्थित होते.
चौकट: “महापुरुषांचा सन्मान राखता येत नसेल तर किमान त्यांचा अपमान तरी करू नका,” अशा शब्दांत यावेळी भाजप कार्यकर्त्यांनी काँग्रेसला इशारा दिला आहे.
