रक्ताने रेखाटले प्रणिता ताईंचे चित्र; उत्कृष्ट चित्रकार प्रवीण नगरे यांच्या अनोख्या कलेची पंढरपुरात चर्चा!
पंढरपूर (प्रतिनिधी):स्वराज्यहेर
विठू माऊलीच्या चरणी लीन असलेल्या पंढरपूर नगरीत सध्या एका कलाकाराच्या अनोख्या कलेची आणि निष्ठेची मोठी चर्चा होत आहे. पंढरपूरच्या नवनियुक्त आणि लोकप्रिय नगराध्यक्षा डॉ. सौ. प्रणिता ताई भालके यांच्या कार्याचा गौरव करण्यासाठी, उत्कृष्ट चित्रकार प्रवीण नगरे यांनी त्यांचे एक वैशिष्ट्यपूर्ण चित्र रेखाटले आहे. विशेष म्हणजे, हे चित्र कोणत्याही कृत्रिम रंगाने नव्हे, तर चित्रकाराने स्वतःच्या रक्ताचा वापर करून साकारले आहे.
डॉ. प्रणिता ताई भालके यांनी नगराध्यक्षपदी निवडून आल्यानंतर अल्पावधीतच आपल्या कामाचा ठसा उमटवला आहे.त्यांच्या याच कार्याप्रती आदर आणि प्रेम व्यक्त करण्यासाठी प्रवीण नगरे या तरुण चित्रकाराने ही अनोखी संकल्पना राबवली. शरीरातील रक्त काढून त्या रक्ताच्या माध्यमातून ताईंच्या प्रतिमेतील प्रत्येक बारकावा प्रवीण यांनी अत्यंत कौशल्याने कागदावर उतरवला आहे.
हे चित्र पाहताना ते रक्ताने बनवले आहे यावर विश्वास बसणार नाही इतकी त्यामध्ये जिवंतपणा आणि स्पष्टता दिसून येते. “प्रणिता ताईंचे नेतृत्व आणि त्यांचे जनतेप्रति असलेले प्रेम पाहून मला काहीतरी वेगळे करण्याची इच्छा होती. माझ्या कलेच्या माध्यमातून त्यांना ही छोटीशी भेट देण्यासाठी मी माझ्या रक्ताचा वापर करून हे चित्र साकारले आहे,” अशी भावना चित्रकार प्रवीण नगरे यांनी व्यक्त केली.
या अनोख्या कलाकृतीची माहिती मिळताच पंढरपुरातील नागरिकांनी आणि राजकीय कार्यकर्त्यांनी चित्रकार प्रवीण नगरे यांच्या धाडसाचे आणि कलेचे कौतुक केले आहे. सोशल मीडियावरही या चित्राचे फोटो मोठ्या प्रमाणात व्हायरल होत असून, प्रणिता ताईंच्या लोकप्रियतेची आणि प्रवीण नगरे यांच्या कलेची सर्वत्र दाद घेतली जात आहे.
