अकलूजमध्ये “छत्रपती संभाजी महाराज चौक” नामकरणास मंजुरी
भाजपच्या मागणीला यश; नगरपरिषद सभागृहात ठरावाला एकमताने संमती
अकलूज प्रतिनिधी; गणेश इंगळे.
अकलूज : अकलूज नगरपरिषदेच्या सभागृहात आज पार पडलेल्या बैठकीत भारतीय जनता पार्टीच्या माध्यमातून करण्यात आलेल्या महत्त्वपूर्ण मागणीला यश मिळाले असून, नवीन बसस्थानकाच्या पाठीमागे प्रथमारचार्य शांतिसागर महाराज महामार्गावरील नव्याने विकसित होणाऱ्या चौकास “छत्रपती संभाजी महाराज चौक” असे नामकरण करण्याबाबतचा ठराव मंजूर करण्यात आला. या निर्णयामुळे शहरातील शिवप्रेमी, युवक आणि नागरिकांमध्ये समाधान व्यक्त करण्यात येत आहे.
छत्रपती संभाजी महाराज यांचे राष्ट्रासाठीचे योगदान, अतुलनीय शौर्य, धर्मरक्षणासाठी दिलेले बलिदान आणि स्वराज्याप्रती असलेली निष्ठा आजही तरुण पिढीसाठी प्रेरणादायी मानली जाते. त्यांच्या नावाने चौकाचे नामकरण होणे म्हणजे इतिहासातील महान पराक्रमाला मानवंदना असल्याची भावना अनेक नागरिकांनी व्यक्त केली.
नगरपरिषदेमध्ये मंजूर झालेल्या या ठरावामुळे अकलूज शहराच्या ऐतिहासिक आणि सांस्कृतिक ओळखीमध्ये आणखी भर पडणार असल्याचे मत व्यक्त होत आहे. शहरातील प्रमुख चौकाला छत्रपती संभाजी महाराजांचे नाव देण्यात आल्याने भविष्यात या ठिकाणी प्रेरणादायी स्मारक स्वरूप विकसित करण्याचीही अपेक्षा नागरिकांकडून व्यक्त केली जात आहे.
या संदर्भात माहिती देताना नगरसेवक तथा भारतीय जनता पार्टी युवा मोर्चाचे अकलूज शहराध्यक्ष महेश लक्ष्मी केशव शिंदे यांनी सांगितले की, “छत्रपती संभाजी महाराजांचे कार्य आणि बलिदान प्रत्येक भारतीयासाठी प्रेरणादायी आहे. त्यांच्या नावाने चौकाचे नामकरण होणे ही अकलूजकरांसाठी अभिमानाची बाब असून, भारतीय जनता पार्टीने सातत्याने केलेल्या पाठपुराव्याला आज यश मिळाले आहे.”
या निर्णयानंतर भाजप कार्यकर्त्यांमध्ये आनंदाचे वातावरण निर्माण झाले असून, अनेकांनी या निर्णयाचे स्वागत करत नगरपरिषद प्रशासनाचे आभार मानले. 🚩
