दुय्यम निबंधक कार्यालय स्थलांतरित करा, अन्यथा पत्रकार भवनासाठी इमारत द्या!
क्रांतिकारी शेतकरी संघटनेची प्रशासनाकडे लक्षवेधी मागणी; पत्रकार शिवराम गायकवाड व रणजितदादा गायकवाड यांचा पुढाकार
अकलूज | प्रतिनिधी
अकलूज नगरपरिषद हद्दीत प्रांताधिकारी कार्यालय आणि सार्वजनिक बांधकाम विभाग कार्यालयाच्या मध्यभागी, तसेच अकलूज पोलीस ठाण्याजवळ कोट्यवधी रुपये खर्चून उभारण्यात आलेली शासकीय इमारत गेल्या पाच महिन्यांपासून वापराविना पडून आहे. दुय्यम निबंधक कार्यालयासाठी बांधण्यात आलेल्या या इमारतीत तातडीने कार्यालय स्थलांतरित करावे; अन्यथा ही इमारत माळशिरस तालुक्यातील पत्रकार भवनासाठी उपलब्ध करून द्यावी, अशी लक्षवेधी मागणी क्रांतिकारी शेतकरी संघटनेच्या माध्यमातून प्रशासनाकडे करण्यात आली आहे.
सदर इमारतीचे बांधकाम पूर्ण होऊन पाच महिने उलटले तरी अद्याप दुय्यम निबंधक कार्यालयाचे स्थलांतर किंवा उद्घाटन झालेले नाही. परिणामी, कोट्यवधींचा शासकीय निधी खर्चून उभारलेली इमारत धूळ आणि अस्वच्छतेच्या विळख्यात पडल्याचे चित्र आहे. एकीकडे नागरिकांना कार्यालयीन कामकाजासाठी प्रतीक्षा करावी लागत असताना दुसरीकडे तयार शासकीय इमारत वापराविना का पडून आहे, असा प्रश्न उपस्थित होत आहे.
दरम्यान, माळशिरस तालुक्यातील पत्रकारांसाठी स्वतंत्र पत्रकार भवन नसणे हा अनेक वर्षांपासून प्रलंबित असलेला प्रश्न आहे. लोकशाहीचा चौथा स्तंभ म्हणून काम करणाऱ्या पत्रकारांना बैठका, पत्रकार परिषदा आणि विविध सामाजिक विषयांवरील चर्चांसाठी हक्काची जागा उपलब्ध नाही. यासाठी पत्रकार बांधवांनी वेळोवेळी शासनदरबारी निवेदने देऊन पाठपुरावा केला असतानाही अद्याप हा प्रश्न मार्गी लागलेला नाही.
त्यामुळे प्रशासनाने दुय्यम निबंधक कार्यालयाचे नियोजित इमारतीत तातडीने स्थलांतर करावे. अन्यथा सदर इमारत पत्रकार भवनासाठी उपलब्ध करून द्यावी. तसेच लोकप्रतिनिधी, महसूल विभाग आणि प्रशासनाने संयुक्त बैठक घेऊन पत्रकार भवनासाठी अकलूज नगरपरिषद हद्दीत शासकीय जागा उपलब्ध करून देण्याबाबत ठोस निर्णय घ्यावा, अशी मागणी निवेदनातून करण्यात आली आहे.
क्रांतिकारी शेतकरी संघटनेचे माळशिरस तालुकाध्यक्ष शिवराम गायकवाड आणि पत्रकार रणजितदादा गायकवाड यांनी ही मागणी लेखी निवेदनाद्वारे प्रशासनासमोर मांडली आहे.
चौकट :
इमारत तयार, निधी खर्च; मग स्थलांतर रखडले कशासाठी?
कोट्यवधींचा शासकीय निधी खर्चून उभारलेली इमारत पाच महिन्यांपासून वापराविना पडून आहे. त्यामुळे दुय्यम निबंधक कार्यालय तातडीने स्थलांतरित करून इमारतीचा उपयोग सुरू करावा; अन्यथा पत्रकार भवनासाठी ही इमारत उपलब्ध करून द्यावी, अशी मागणी करण्यात आली आहे.
