अवघ्या दीड तासात राजगड सर; चार वर्षांच्या आरवनेही आधाराशिवाय केला गड सर, दहा महिन्यांच्या चिमुकलीसह आईचीही मोहिमेत सहभाग
अकलूज | सुधीर पवार
श्री शिवप्रतिष्ठान हिंदुस्थान, अकलूज विभागाच्या वतीने श्री दुर्गामाता दौडमध्ये सहभागी झालेल्या महिला आणि वेशभूषाधारक कलाकारांसाठी गुरुवार, दिनांक २२ ऑक्टोबर २०२६ रोजी राजगड देशाटन मोहिमेचे आयोजन करण्यात आले होते. या मोहिमेत १६ महिलांनी सहभाग नोंदवत आपल्या जिद्दीची आणि धाडसाची प्रचिती दिली. महिलांनी अवघ्या दीड तासात राजगड सर करत बालेकिल्ल्यावरही यशस्वी चढाई केली. अनेक तरुणांची दमछाक होणारा बालेकिल्ला सर करून या महिलांनी आपण छत्रपती शिवरायांच्या वाघिणी आणि राजमाता जिजाऊंच्या लेकी आहोत, हे आपल्या कृतीतून दाखवून दिले.
राजगड सर करण्यास उशीर झाल्यामुळे सुवेळा माची पाहता येईल की नाही, याबाबत सुरुवातीला अनिश्चितता होती. मात्र, न थकता, न थांबता आणि सर्व ऐतिहासिक ठिकाणे पाहिल्याशिवाय परत जायचे नाही, असा निर्धार करत महिलांनी ही मोहीम यशस्वी केली. या मोहिमेत पद्मावती माची, पद्मावती मंदिर, रामेश्वर मंदिर, सोनपंत डबीर समाधी, सुवेळा माची, काळेश्वरी बुरुज, चिलखती बुरुज आणि हत्ती प्रस्तर यांसह बालेकिल्ल्यावरून संजीवनी माचीचे दर्शन घडवण्यात आले. शारीरिक थकवा आणि चढाईतील अडचणींवर मात करत महिलांनी दाखवलेली जिद्द, चिकाटी आणि इतिहास जाणून घेण्याची तळमळ कौतुकास्पद ठरली.
या मोहिमेचे आणखी एक वैशिष्ट्य म्हणजे बाल धारकऱ्यांचा सहभाग. बाल धारकरी श्रीतेज घोडके याचाही मोहिमेत समावेश होता. विशेष म्हणजे, अवघ्या चार वर्षांच्या आरव वैभव वढतिले याने पहिल्यांदाच कोणाचाही आधार न घेता स्वतः चालत राजगड सर केला. त्याच्या या जिद्दीचे आणि धाडसाचे विशेष कौतुक होत आहे. तसेच कोमल वढतिले यांनी आपल्या अवघ्या दहा महिन्यांच्या चिमुकल्या मुलीला सोबत घेऊन राजगड सर केला. महिला, बाल धारकरी आणि चिमुकल्या बाळासह सहभागी झालेल्या आईच्या उपस्थितीमुळे मोहिमेला एक वेगळीच प्रेरणादायी उंची मिळाली.
या मोहिमेचे नियोजन अवघ्या एका दिवसात करण्यात आले होते. महिलांना एकत्रित करून मोहिमेसाठी सज्ज करण्याची जबाबदारी प्रतीक्षा ताई माने,किरणताई सूर्यवंशी यांच्यावर सोपवण्यात आली होती. त्यांनी अवघ्या चार तासांत सर्व महिलांना एकत्रित करून मोहिमेची तयारी पूर्ण केली. त्यांच्या तत्परतेचे आणि नियोजनाचे विशेष कौतुक करण्यात आले.
या मोहिमेत सहभागी झालेल्या रणरागिणींची नावे पुढीलप्रमाणे:
- १. किरण सूर्यवंशी
- २. प्रीती जाधव
- ३. प्रतीक्षा दोरकर
- ४. सई शिंदे
- ५. आरती ओतारी
- ६. राणी ननवरे
- ७. श्रीदेवी घोडके
- ८. राधा घोडके
- ९. कृष्णाली घोडके
- १०. स्वप्नाली पवार
- ११. प्रतीक्षा माने
- १२. अंजली गायकवाड
- १३. स्नेहल बेद्रे
- १४. वैभवी माने
- १५. किरण राजगे
- १६. रजनी गायकवाड
एकूण सहभागी महिला : १६
ही मोहीम यशस्वी करण्यासाठी सुधीर पवार, गणेश इंगळे, दीपक चिंतामणी, महेश जाधव, नागराज शिंदे आणि वैभव वढतिले यांचे मोलाचे सहकार्य लाभले. सर्वांच्या नियोजन, सहकार्य आणि सामूहिक प्रयत्नांमुळे ही मोहीम यशस्वी झाली आणि सर्वांना सुखरूप घरी परत आणण्यात आले. या मोहिमेसाठी सहकार्य करणाऱ्या सर्वांचे मनःपूर्वक आभार व कौतुक करण्यात आले.
यापुढेही श्री शिवप्रतिष्ठान हिंदुस्थान, अकलूज विभागाच्या माध्यमातून दर दोन ते तीन महिन्यांनी अशा देशाटन मोहिमा आयोजित करण्याचा मानस व्यक्त करण्यात आला. महिलांना निसर्गसौंदर्याचा आनंद घेता यावा, छत्रपती शिवाजी महाराजांच्या गड-किल्ल्यांचा गौरवशाली इतिहास प्रत्यक्ष अनुभवता यावा आणि स्वराज्याविषयीची आस्था अधिक दृढ व्हावी, हा या उपक्रमामागील उद्देश आहे. मोहिमेत सहभागी झालेल्या सर्व रणरागिणींचे अभिनंदन करण्यात आले असून, काही कारणास्तव सहभागी होता न आलेल्या महिलांनी पुढील मोहिमेत सहभागी व्हावे आणि श्री शिवप्रतिष्ठान हिंदुस्थानच्या प्रत्येक कार्यात उत्स्फूर्त सहभाग नोंदवावा, असे आवाहन करण्यात आले.
“तुमच्या जिद्दीला सलाम, तुमच्या धाडसाचा अभिमान! तुम्ही केवळ राजगड सर केला नाही, तर दृढ इच्छाशक्ती आणि एकजुटीच्या बळावर कोणतेही आव्हान पेलता येते, हे सिद्ध केले,” अशा शब्दांत सुधीर पवार यांनी सहभागी महिलांचे आणि सहकार्य करणाऱ्या सर्वांचे कौतुक केले.
जय भवानी! जय शिवाजी!
