सातारा डॉक्टर तरुणी मृत्यू प्रकरणात मुख्य आरोपी असलेला पीएसआय गोपाल बदने याने पोलिसांत आत्मसमर्पण केलं आहे.
(सातारा प्रतिनिधी) :
फलटण उपजिल्हा रुग्णालयातील महिला डॉक्टरने आपल्या आयुष्याची अखेर केली. याप्रकरणातील संशयित मुख्य आरोपी पोलीस उपनिरीक्षक गोपाल बदने याला शनिवारी संध्याकाळी अटक करण्यात आली. या पूर्वी आरोपी सॉफ्टवेअर इंजिनिअर प्रशांत बनकर याला पुण्यातून पोलिसांनी ताब्यात घेतलं होतं. या दोघांचीही नाव त्या डॉक्टर तरुणीच्या हातावर लिहिलेही होती.
सातारा पोलीस अधीक्षक तुषार दोशी यांनी दिलेल्या माहितीनुसार, गोपाल बदने याने फलटण ग्रामीण पोलीस ठाण्यात आत्मसमर्पण केले आहे. त्याच्याविरुद्ध मानसिक छळ आणि जीव देण्यास प्रवृत्त केल्याचा गुन्हा दाखल करण्यात आला आहे.
आयुष्याची अखेर करणारी महिला डॉक्टर ही बीड जिल्ह्यातील रहिवासी होती आणि ती साताऱ्यातील फलटण उपजिल्हा रुग्णालयात तैनात होती. ती फलटण शहरातील एका हॉटेलच्या खोलीत गळफास घेतलेल्या अवस्थेत आढळून आली होती. तिच्या तळहातावर लिहिलेल्या सुसाईड नोटमध्ये तिने आरोप केला आहे की, पीएसआय बदने याने तिच्यावर अनेक वेळा अत्याचार केला, तर बनकर याने तिचा मानसिक छळ केला. शुक्रवारी रात्री बीडमधील वडवणी तहसीलमधील तिच्या मूळ गावी या डॉक्टरचा अंत्यसंस्कार करण्यात आले.
पोलिसांनी बनकर हा डॉक्टरच्या घरमालकाचा मुलगा असल्याचं सांगितलं. जीव देण्यापूर्वी डॉक्टर आणि त्याच्यामध्ये फोनवरुन बोलणं झालं होतं. तपासात पोलीसाचं नाव समोर आल्यानंतर बदने याला निलंबित करण्यात आले.
या प्रकरणात, डॉक्टरच्या आरोपांवरून पोलिसांनी अत्याचार आणि जीव देण्यास प्रवृत्त केल्याचा गुन्हा दाखल केला आहे. कुटुंबाने आरोपींना कठोर शिक्षा देण्याची मागणी केली आहे.
पीडित महिला डॉक्टरच्या दोन चुलत भावांनी, जे स्वत: डॉक्टर आहेत, त्यांनी आरोप केला आहे की, रुग्णालय प्रशासनाने तिला त्रास देण्यासाठी जाणूनबुजून तिच्यावर पोस्टमॉर्टेमची जबाबदारी सोपवली होती. कुटुंबाने सांगितलं की, डॉक्टरला एमडी (डॉक्टर ऑफ मेडिसिन) कोर्स करायचा होता आणि ती त्यासाठी तयारी करत होती. पण, तिचं स्वप्न पूर्ण होण्यापूर्वीच ती या जगातून निघून गेली.
