अकलूजमध्ये रंगणार बैलगाडा शर्यतीचा थरार! १ लाख ५० हजारांचे पहिले बक्षीस; १४ मार्च रोजी भव्य आयोजन
सहकार महर्षी शंकरराव मोहिते-पाटील यांच्या स्मृतिदिनानिमित्त ‘विजय गणेशोत्सव मंडळा’चा उपक्रम; तयारी पूर्ण
अकलूज (प्रतिनिधी): रणजितदादा गायकवाड.
महाराष्ट्राचे माजी उपमुख्यमंत्री श्री. विजयसिंह मोहिते-पाटील यांच्या मार्गदर्शनाखाली आणि सहकार महर्षी शंकरराव मोहिते-पाटील यांच्या पुण्यतिथीचे औचित्य साधून, येत्या १४ मार्च रोजी अकलूजमध्ये भव्य ‘ओपन बैलगाडा शर्यतींचे’ आयोजन करण्यात आले आहे. या स्पर्धेत महाराष्ट्रातील दिग्गज बैलगाडा मालक सहभागी होणार असून, यंदाचा थरार ऐतिहासिक ठरेल, अशी माहिती अकलूज बाजार समितीचे सभापती मदनसिंह मोहिते-पाटील यांनी पत्रकार परिषदेत दिली.
१३ मार्चपर्यंत नाव नोंदणीची मुदत
कृषी उत्पन्न बाजार समितीच्या कार्यालयात आयोजित पत्रकार परिषदेत बोलताना मदनसिंह मोहिते-पाटील म्हणाले की, विजय गणेशोत्सव मंडळाच्या वतीने आयोजित या स्पर्धेला १४ मार्च रोजी सकाळी ८ वाजल्यापासून सुरुवात होईल. स्पर्धेत सहभागी होणाऱ्या गाडा मालकांनी आपली नावे १३ मार्च रोजी संध्याकाळी ६ वाजेपर्यंत नोंदवणे अनिवार्य आहे. स्पर्धेसाठी १००० रुपये प्रवेश शुल्क ठेवण्यात आले असून, गेल्या वर्षीच्या ४७१ स्पर्धकांचा आकडा यंदा पार होईल, असा विश्वास त्यांनी व्यक्त केला.
लाखांची बक्षिसे आणि मानाचे मानचिन्ह
या स्पर्धेतील विजेत्यांवर बक्षिसांचा वर्षाव होणार आहे:
- प्रथम क्रमांक: १,५०,००० रुपये + मानाची झुल, बाशिंग, शेंब्या, तुळशीमाळ आणि चषक.
- द्वितीय क्रमांक: १,१०,००० रुपये व चषक.
- तृतीय क्रमांक: ७१,००० रुपये व चषक.
- चतुर्थ क्रमांक: ६१,००० रुपये.
- पाचवा क्रमांक: ५१,००० रुपये.
- सहावा क्रमांक: ३१,००० रुपये.
- सातवा क्रमांक: २१,००० रुपये.
- आठवा क्रमांक: ११,००० रुपये.
नियम आणि थेट प्रक्षेपण
स्पर्धेचे मैदान १००० फूट लांबीचे असून, महाराष्ट्र राज्य बैलगाडा शर्यत संघ व माळशिरस तालुका संघ यांच्या नियमावलीचे काटेकोर पालन केले जाणार आहे. जे शौकीन मैदानावर येऊ शकणार नाहीत, त्यांच्यासाठी स्पर्धेचे ‘लाईव्ह’ थेट प्रक्षेपण करण्यात येणार आहे.
दिग्गजांचे नियोजन आणि उपस्थिती
या भव्य स्पर्धेचे नियोजन जि.प. सदस्य अर्जुनसिंह मोहिते-पाटील हे आमदार रणजितसिंह मोहिते-पाटील व खासदार धैर्यशीलभैय्या मोहिते-पाटील यांच्या मार्गदर्शनाखाली करत आहेत. पत्रकार परिषदेप्रसंगी भीमराव काळे, चंद्रकांत कुंभार, लक्ष्मण पवार, देविदास ढोपे, लखन चव्हाण, श्रीकांत राऊत, संतोष शिंदे, राजेंद्र पवार आणि बाजार समितीचे सचिव काकडे उपस्थित होते.
