- स्वराज्य हेर

महाशिवरात्री निमित्त अकलूजच्या श्री नीलकंठेश्वर मंदिरात महारुद्राभिषेक आणि जागर सोहळा….

स्वराज्यहेर अकलूज (प्रतिनिधी):

अकलूज येथील निरा नदीपलीकडे असलेल्या प्रसिद्ध श्री नीलकंठेश्वर महादेव देवस्थान येथे महाशिवरात्री निमित्त ‘महारुद्राभिषेक’ आणि ‘शिवरात्री जागर’ सोहळ्याचे भव्य आयोजन करण्यात आले आहे.श्री आनंदमूर्ती मित्र मंडळ, अकलूज यांच्या वतीने गेल्या २५ वर्षांपासून ही परंपरा अखंडपणे सुरू असून, यंदा या उपक्रमाचे २६ वे वर्ष आहे.

दिनांक १५ फेब्रुवारी २०२६ रोजी होणाऱ्या या सोहळ्याची सुरुवात रात्री ०९:०० वाजता महारुद्राभिषेकाने होईल.

महाशिवरात्रीचे औचित्य साधून भगवान नीलकंठेश्वराला जलाभिषेक व विधिवत पूजा करण्यात येणार आहे. त्यानंतर रात्रभर शिवरात्रीचा जागर केला जाणार असून, मध्यरात्री ठीक १२:०० वाजता भगवान शंकराच्या चरणी अत्यंत पवित्र मानले जाणारे ‘बिल्वार्चन’ अर्पण केले जाईल.

आनंदमूर्ती मित्र मंडळाच्या वतीने या कार्यक्रमाची जय्यत तयारी सुरू आहे. गेल्या अडीच दशकांपासून सुरू असलेला हा भक्तीचा वारसा यंदाही मोठ्या उत्साहात साजरा होणार आहे. या सोहळ्यामुळे निरा नदीचा परिसर शिवनामाच्या जयघोषाने आणि चैतन्याने न्हाऊन निघणार आहे.

“महाशिवरात्रीच्या या पवित्र पर्वावर आयोजित महारुद्राभिषेक पूजेचा आणि दर्शनाचा लाभ सर्व भाविक भक्तांनी घ्यावा. या भक्तीमय वातावरणात सहभागी होऊन ही महाशिवरात्र अधिक चैतन्यमय करावी,” असे आवाहन आनंदमूर्ती मित्र मंडळाच्या कार्यकर्त्यांकडून करण्यात आले आहे.