चॉकलेटचे आमिष दाखवून विद्यार्थ्यांच्या अपहरणाचा प्रयत्न..
माळशिरस प्रतिनिधी रणजीतदादा गायकवाड.
नातेपुते : माळशिरस तालुक्यातील मांडवे परिसरातून एक अत्यंत धक्कादायक आणि पालकांची झोप उडवणारी घटना घडली. शालेय विद्यार्थ्यांना चॉकलेटचे आमिष दाखवून त्यांचे अपहरण करण्याचा प्रयत्न अज्ञात टोळीकडून केला जात असल्याचे उघड झाले. यामुळे संपूर्ण तालुक्यात भीतीचे सावट पसरले आहे.
गुरुवारी सकाळी मांडवे येथील रत्नप्रभादेवी मोहिते पाटील प्राथमिक शाळेच्या परिसरात ही घटना घडली. शाळा भरण्याच्या वेळेत एक राखाडी रंगाची ओमनी गाडी शाळेजवळ येऊन थांबली. तीन अज्ञात गाडीतील इसमांनी रस्त्याने जाणाऱ्या विद्यार्थ्यांना जवळ बोलावून ‘चॉकलेट देतो’, असे सांगून गाडीत बसवण्याचा प्रयत्न केला. मात्र, विद्यार्थ्यांच्या प्रसंगावधानामुळे आणि संशयास्पद हालचालींमुळे मोठा अनर्थ टळला. मांडवे पोलिस पाटलांनी तातडीने ग्राम सुरक्षा यंत्रणेला मेसेज पाठवून सर्वांना सावध केले.
- शाळकरी मुलांना एकटे सोडू नका.
- शक्यतो लहान मुलांना शाळेत सोडताना आणि आणताना पालकांनी स्वतः सोबत राहावे.
- परिसरात विना क्रमांकाची किंवा काळ्या काचांची गाडी संशयास्पदरीत्या फिरताना दिसल्यास तत्काळ पोलिसांना (१०० नंबरवर) कळवा.
- विद्यार्थ्यांना शाळेत येताना-जाताना मित्रांसोबत गटाने राहण्यास सांगावे.
- अनोळखी व्यक्तींपासून सावध.
- मुलांना सांगा की, कोणाही अनोळखी व्यक्तीने दिलेले चॉकलेट, बिस्किटे किंवा खेळणी घेऊ नका.
पालकांनी काळजी घ्यावी.
आमच्या प्राथमिक शाळेतील एक मुलगा रस्त्याने सायकलवर येत असताना त्यास काही अज्ञात लोकांनी अडवून ‘चॉकलेट धर, तुला शाळेत सोडतो’, म्हणून त्यास चॉकलेट देण्याचा प्रयत्न केला. परंतु, तो मुलगा सायकलवर येत असल्याने चॉकलेट देण्याचा प्रयत्न करत असताना तो सायकल भरधाव चालवून ओरडत शाळेच्या परिसरात आला. त्याने संबंधित शिक्षिकांना झाल्या प्रकाराबद्दल सांगितले. पालकांनी काळजी घावी, याबाबत केंद्रप्रमुखांनी शाळेला सूचना दिलेल्या आहेत.
ही गाडी लोणंद-मांडवे मार्गावरून अत्यंत वेगाने निघून गेली आहे.
माळशिरस तालुक्यातील फोडशिरस केंद्रातील शाळेत काही दिवसांपूर्वी अशीच घटना घडली होती.
“मांडवे परिसरात घडलेला हा प्रकार अतिशय गंभीर आहे. पालकांनी घाबरून न जाता सतर्क राहणे गरजेचे आहे. कोणत्याही संशयास्पद व्यक्तीबद्दल माहिती मिळाल्यास तत्काळ नजीकच्या पोलिस स्टेशनशी संपर्क साधावा.”
महारुद्र परजणे.स.पो.नि,नातेपुते पोलीस स्टेशन.
