खासदार धैर्यशील मोहिते-पाटील यांच्या शिरपेचात मानाचा तुरा ; भारत-UAE संसदीय मैत्री समितीवर सदस्य म्हणून नियुक्ती
नवी दिल्ली/प्रतिनिधी: स्वराज्य हेर
१८ व्या लोकसभेच्या कार्यकाळासाठी भारत सरकारच्या संसदीय कामकाजात महत्त्वाची भूमिका बजावणाऱ्या ‘भारत-संयुक्त अरब अमिराती’ (UAE) संसदीय मैत्री समितीवर माढा लोकसभा मतदारसंघाचे खासदार धैर्यशील मोहिते-पाटील यांची सदस्य म्हणून नियुक्ती करण्यात आली आहे. लोकसभा अध्यक्षांच्या मान्यतेने ही नियुक्ती जाहीर करण्यात आली असून, अधिकृत पत्राद्वारे त्यांना ही जबाबदारी सोपवण्यात आली आहे.
राजनैतिक संबंधांना मिळणार बळकटी
भारत आणि संयुक्त अरब अमिराती या दोन्ही देशांमध्ये ऐतिहासिक आणि घनिष्ठ मैत्रीचे संबंध आहेत. दोन्ही देशांमधील संसदीय लोकशाही अधिक वृद्धिंगत करणे, विचारांची देवाणघेवाण करणे आणि राजनैतिक संबंधांमध्ये सुसूत्रता आणणे, या उद्देशाने या संसदीय मैत्री समितीची स्थापना करण्यात आली आहे. या समितीत खासदार मोहिते-पाटील यांची निवड झाल्याने त्यांच्या संसदीय कारकिर्दीतील एक महत्त्वपूर्ण टप्पा मानला जात आहे.
व्यापार, ऊर्जा आणि संरक्षणावर असणार भर
भारत आणि युएई यांच्यात व्यापार, गुंतवणूक, ऊर्जा, संरक्षण, शिक्षण आणि सांस्कृतिक क्षेत्रात मोठे सहकार्य आहे. या समितीच्या माध्यमातून दोन्ही देशांतील लोकप्रतिनिधी एकमेकांशी संवाद साधतील, ज्यामुळे परस्पर सहकार्य अधिक बळकट होण्यास मदत होईल. विशेषतः आर्थिक आणि धोरणात्मक पातळीवर ही समिती दोन्ही देशांतील दुवा म्हणून काम करेल.
खासदार धैर्यशील मोहिते-पाटील यांची प्रतिक्रिया:
या निवडीबद्दल समाधान व्यक्त करताना खासदार धैर्यशील मोहिते-पाटील म्हणाले की, “भारत आणि संयुक्त अरब अमिराती यांच्यातील मैत्रीपूर्ण संबंध अधिक दृढ करण्यासाठी संसदीय स्तरावर सकारात्मक भूमिका बजावण्याची संधी मला मिळाली आहे, याचा आनंद आहे. या माध्यमातून दोन्ही देशांच्या विकासासाठी आणि सहकार्यासाठी मी कटिबद्ध राहीन. मला ही मोठी जबाबदारी दिल्याबद्दल मी भारत सरकार आणि लोकसभा अध्यक्षांचे मनापासून आभार मानतो.”
मतदारसंघात आनंदाचे वातावरण
खासदार धैर्यशील मोहिते-पाटील यांना आंतरराष्ट्रीय स्तरावरील महत्त्वाच्या समितीवर काम करण्याची संधी मिळाल्याने त्यांच्या मतदारसंघातही आनंदाचे वातावरण आहे. त्यांच्या या नियुक्तीमुळे स्थानिक विकासासोबतच राष्ट्रीय आणि आंतरराष्ट्रीय प्रश्नांवरही त्यांचा प्रभाव वाढणार असून, हा मतदारसंघासाठी अभिमानाचा क्षण असल्याची भावना समर्थकांनी व्यक्त केली आहे.
