आयुष्यातील पहिली कमाई बा विठ्ठलाच्या चरणी अर्पण
संगीत क्षेत्रात नाव कमावणाऱ्या प्रणिती उर्फ परीची अनोखी भक्ती
पंढरपूर : संगीत क्षेत्रात आपल्या कलेच्या माध्यमातून नाव कमावण्याच्या दिशेने वाटचाल करणाऱ्या प्रणिती उर्फ परी हिने आपल्या आयुष्यातील पहिली कमाई श्री विठ्ठलाच्या चरणी अर्पण करून अनोखी भक्तीभावना जपली.
संगीत क्षेत्रात सेवा देताना प्रणितीला मिळालेल्या पहिल्या कार्यक्रमाच्या मानधनाची रोख रक्कम विठ्ठलाच्या चरणी अर्पण करण्याची तिची मनोमन इच्छा होती. त्यानुसार आज खास तिच्या या इच्छेची पूर्तता करण्यात आली. आपल्या संगीत क्षेत्रातील वाटचालीत बा विठ्ठलाने सदैव साथ द्यावी आणि भविष्यात संगीत क्षेत्रातील अत्युच्च शिखर गाठण्याची शक्ती मिळावी, अशी प्रार्थना तिने विठ्ठल चरणी केली.
प्रणिती उर्फ परी ही सारंग संगीत विद्यालयाचे सर्वेसर्वा आदरणीय झांबरे सर यांच्या मार्गदर्शनाखाली हार्मोनियम संगीताचे धडे गिरवत आहे. आतापर्यंत तिने हार्मोनियम संगीताच्या दोन परीक्षा चांगल्या गुणांनी उत्तीर्ण केल्या आहेत. आपल्या संगीत कलेच्या जोरावर तिने विविध सार्वजनिक कार्यक्रमांमध्ये सहभाग घेत उपस्थितांची मने जिंकली आहेत.
याच कार्यक्रमांमधून मिळालेल्या मानधनातील पहिल्या कार्यक्रमाची कमाई तिने विठ्ठलाच्या चरणी अर्पण केली. आपल्या संगीत सेवेत विठ्ठलाचे स्थान सर्वात मोठे असल्याची भावना या कृतीतून तिने व्यक्त केली.
प्रणितीच्या या संगीत प्रवासात सारंग संगीत विद्यालयाचे सर्वेसर्वा झांबरे सर यांचे मोठे योगदान आहे. तसेच तिच्या कलेला वडील विनोद थिटे, आई साधना आणि बहीण प्रेरणा यांचे वेळोवेळी प्रोत्साहन मिळत आहे.
पहिली कमाई स्वतःसाठी न ठेवता ती विठ्ठल चरणी अर्पण करणाऱ्या प्रणितीच्या या भक्तीभावाचे आणि संगीत साधनेचे सर्वत्र कौतुक होत आहे. भविष्यात तिच्या संगीत साधनेला यशाची नवी उंची मिळावी, हीच विठ्ठल चरणी प्रार्थना.
