अर्धनारी नटेश्वर स्वरूपात मल्लिकार्जुन महादेवाची पूजा; श्रावण अमावस्येनिमित्त विशेष सोहळा
अकलूज | प्रतिनिधी
श्री स्वामी समर्थ केंद्र (दिंडोरी प्रणित) यांच्या वतीने श्रावण मास समाप्तीनिमित्त अकलूज येथील देशमुख गल्लीतील श्री मल्लिकार्जुन महादेव मंदिरात श्रावण अमावस्येच्या दिवशी महादेवास दहीभात लेपन पूजा अर्थात सांत्वन पूजा भक्तिभावाने करण्यात आली.
यावेळी मंदिरातील चंद्रशेखर शेटे आणि दिपराज फत्तेसिंह माने देशमुख यांनी महादेवाची अर्धनारी नटेश्वर स्वरूपातील पूजा बांधली. पारंपरिक धार्मिक विधी आणि मंत्रोच्चारांच्या वातावरणात ही पूजा संपन्न झाली.
पूजा संपूर्ण झाल्यानंतर सर्प स्वरूपात महादेवाने दर्शन दिल्याचा अनुभव आल्याची माहिती दिपराज माने देशमुख यांनी दिली. या प्रसंगामुळे उपस्थित भाविकांमध्ये श्रद्धेचे आणि भक्तिमय वातावरण निर्माण झाले.
संपूर्ण श्रावण महिनाभर मंदिरात विविध धार्मिक उपक्रमांचे आयोजन करण्यात आले होते. श्रावण अमावस्येनिमित्त झालेल्या या विशेष पूजेला भाविकांनी उपस्थित राहून महादेवाचे दर्शन घेतले.
