माळशिरस विधानसभा मतदारसंघाची प्रारूप मतदार यादी प्रसिद्ध; 30 सप्टेंबरपर्यंत दावे-हरकतींची संधी
अकलूज | प्रतिनिधी
माळशिरस विधानसभा मतदारसंघातील मतदारांसाठी महत्त्वाची बातमी समोर आली आहे.
भारत निवडणूक आयोगाच्या निर्देशानुसार विशेष सखोल पुनरीक्षण कार्यक्रम 2026 अंतर्गत 254 माळशिरस (अ.जा.) विधानसभा मतदारसंघाची प्रारूप मतदार यादी 31 ऑगस्ट 2026 रोजी प्रसिद्ध करण्यात आली आहे.
या प्रारूप मतदार यादीमध्ये आपले नाव आहे का? आपल्या कुटुंबातील सर्व पात्र सदस्यांची नावे मतदार यादीत आहेत का? याची तपासणी करण्याचे आवाहन प्रशासनाकडून करण्यात आले आहे.
मतदारांनी यादीमध्ये नाव, पत्ता, वय, लिंग, मतदार ओळखपत्र क्रमांक म्हणजेच EPIC आणि मतदान केंद्राची माहिती काळजीपूर्वक तपासावी.
नावामध्ये काही त्रुटी असल्यास, नाव समाविष्ट नसल्यास किंवा मतदार यादीतील नोंदीमध्ये बदल आवश्यक असल्यास, विहित नमुन्यात अर्ज करून दुरुस्ती अथवा नाव समाविष्ट करण्याची कार्यवाही करता येणार आहे.
30 सप्टेंबरपर्यंत दावे-हरकती
प्रारूप मतदार यादी प्रसिद्ध झाल्यानंतर 31 ऑगस्ट ते 30 सप्टेंबर 2026 या कालावधीत दावे आणि हरकती स्वीकारल्या जाणार आहेत.
त्यानंतर 31 ऑगस्ट ते 29 ऑक्टोबर 2026 या कालावधीत प्राप्त दावे-हरकतींवर सुनावणी घेऊन निर्णय करण्यात येणार आहे.
यासाठी मतदार मतदान केंद्रस्तरीय अधिकारी म्हणजेच BLO तसेच सहायक मतदार नोंदणी अधिकारी AERO यांच्याकडे अर्ज सादर करू शकतात.
नवीन मतदार नोंदणीसाठी नमुना क्रमांक 6, मतदार यादीतील मृत किंवा स्थलांतरित व्यक्तीचे नाव वगळण्यासाठी नमुना क्रमांक 7, तर नाव, जन्मतारीख, वय, लिंग, नातेसंबंध, पत्ता, अपंगत्वाची नोंद किंवा नवीन E-EPIC यांसारख्या दुरुस्तीसाठी नमुना क्रमांक 8 वापरता येणार आहे.
हे अर्ज Voter Services Portal आणि Voter Helpline App द्वारे ऑनलाइन देखील करता येणार आहेत.
विशेष म्हणजे, 1 ऑक्टोबर 2026 रोजी किंवा त्यापूर्वी वयाची 18 वर्षे पूर्ण करणाऱ्या पात्र नागरिकांनाही नवीन मतदार नोंदणी करता येणार आहे.
त्यामुळे माळशिरस विधानसभा मतदारसंघातील नागरिकांनी 30 सप्टेंबर 2026 पूर्वी आपल्या मतदार यादीतील नोंदी तपासून आवश्यक असल्यास दावे अथवा हरकती नोंदवाव्यात, असे आवाहन मतदार नोंदणी अधिकारी तथा उपविभागीय अधिकारी, माळशिरस विभाग अकलूज यांच्या वतीने करण्यात आले आहे.
लोकशाही बळकट करण्यासाठी प्रत्येक पात्र नागरिकाने या पुनरीक्षण प्रक्रियेत सहभागी व्हावे.
आणि लक्षात ठेवा—
4 नोव्हेंबर 2026 रोजी अंतिम मतदार यादी प्रसिद्ध होणार आहे.
