भरधाव भारत बेंझ मिक्सरची मोटारसायकलला धडक; बागेचीवाडीतील ४२ वर्षीय प्लंबरचा जागीच मृत्यू
मिक्सरच्या निष्काळजीपणाचा बळी; सचिन काळे यांचा जागीच मृत्यू
अकलूज प्रतिनिधी : अकलूज येथील बस स्थानकाच्या पाठीमागे महावीर पथकडे जाणाऱ्या रस्त्यावर प्रवीण इलेक्ट्रॉनिक्ससमोर बुधवारी (दि. १० जून) दुपारी सुमारे ३ वाजण्याच्या सुमारास भीषण अपघात घडला. भरधाव वेगाने येणाऱ्या भारत बेंझ मिक्सर वाहनाने मोटारसायकलला समोरून जोरदार धडक दिल्याने ४२ वर्षीय प्लंबरचा जागीच दुर्दैवी मृत्यू झाला. अपघातानंतर जखमीला कोणतीही मदत न करता चालक घटनास्थळावरून पसार झाल्याने संताप व्यक्त होत आहे.
या अपघातात मृत्यू झालेल्या तरुणाचे नाव सचिन सुभाष काळे (वय ४२, रा. बागेचीवाडी, पद्मावतीनगर, ता. माळशिरस, जि. सोलापूर) असे आहे.
मिळालेल्या माहितीनुसार, सचिन काळे हे प्लंबिंग व मजुरीची कामे करून आपल्या कुटुंबाचा उदरनिर्वाह करत होते. बुधवारी दुपारी ते त्यांच्या पॅशन प्रो मोटारसायकल (MH 45 M 3312) वरून खाजगी तसेच प्लंबिंगच्या कामानिमित्त अकलूज येथे आले होते. दुपारी सुमारे ३ वाजण्याच्या सुमारास प्रवीण इलेक्ट्रॉनिक्ससमोर समोरून येणाऱ्या भारत बेंझ मिक्सर वाहनाने (MH 42 BF 6573) त्यांच्या मोटारसायकलला भरधाव व निष्काळजीपणे धडक दिली. या भीषण धडकेत सचिन काळे गंभीर जखमी होऊन रस्त्यावर कोसळले.
अपघाताची माहिती मिळताच परिसरातील नागरिक व ओळखीच्या व्यक्तींनी त्यांना तातडीने उपचारासाठी अकलूज येथील अकलाई हॉस्पिटलमध्ये दाखल केले. मात्र, तेथील डॉक्टरांनी तपासणीपूर्वीच त्यांना मृत घोषित केले.
अपघातानंतर घटनास्थळी जमलेल्या नागरिकांसमोर चालकाने आपले नाव मधुकर आण्णा जानकर (रा. जाधववाडी, भांबुर्डी, ता. माळशिरस) असल्याचे सांगितले. मात्र, जखमीला कोणतीही वैद्यकीय मदत न करता तसेच पोलिसांना माहिती न देता वाहन बाजूला लावून तो घटनास्थळावरून पसार झाला.
याप्रकरणी मृत सचिन काळे यांचे वडील सुभाष विष्णू काळे (वय ७०) यांनी अकलूज पोलीस ठाण्यात फिर्याद दाखल केली आहे. त्यांच्या फिर्यादीवरून चालक मधुकर आण्णा जानकर याच्याविरुद्ध गुन्हा रजिस्टर क्रमांक ४१७/२०२६ अन्वये भारतीय न्याय संहिता (BNS) कलम १०६(१), २८१ तसेच मोटार वाहन कायदा कलम १८४, १३४(अ) व १३४(ब) अंतर्गत गुन्हा दाखल करण्यात आला आहे.
या प्रकरणाचा पुढील तपास पोलीस हेड कॉन्स्टेबल बागडे (HC-980) करीत आहेत. दरम्यान, कुटुंबाचा आधारस्तंभ असलेल्या तरुणाचा अपघातात मृत्यू झाल्याने बागेचीवाडी परिसरात हळहळ व्यक्त होत आहे.
