दत्तनगरमध्ये सेवा पंधरवड्यानिमित्त आरोग्य शिबिर संपन्न; ७५ नागरिकांची आरोग्य तपासणी
दत्तनगर प्रतिनिधी :अक्षय चौगुले
जय मल्हार गणेशोत्सव मंडळ तसेच भारतीय जनता पार्टी दत्तनगर-खंडाळी यांच्या संयुक्त विद्यमाने आदरणीय पंतप्रधान नरेंद्र मोदी यांच्या वाढदिवसानिमित्त ‘सेवा पंधरवडा’ अंतर्गत दत्तनगर येथे आरोग्य शिबिराचे आयोजन करण्यात आले. या शिबिरात परिसरातील ७५ नागरिकांची आरोग्य तपासणी करण्यात आली.
या शिबिरामध्ये नागरिकांची रक्तदाब, रक्तातील साखर, हिमोग्लोबिन तपासणी तसेच कावीळ व व्हिडीआरएल चाचणी करण्यात आली. तपासणीनंतर नागरिकांना आपल्या आरोग्याची योग्य काळजी घेण्याबाबत मार्गदर्शन करण्यात आले. तसेच आवश्यकतेनुसार योग्य औषधोपचार व आरोग्यविषयक मौलिक सल्ला देण्यात आला.
शिबिराला परिसरातील महिला व नागरिकांचा उत्स्फूर्त प्रतिसाद मिळाला. यावेळी नागरिकांनी मोठ्या संख्येने उपस्थित राहून आरोग्य तपासणी करून घेतली.
महाळुंग आरोग्य उपकेंद्राच्या वतीने आरोग्य सहाय्यक बनसोडे मॅडम यांच्या मार्गदर्शनाखाली आरोग्यसेविका सुप्रिया मॅडम, आरोग्यसेवक गारोळे सर, गुरव सर, तसेच आशा स्वयंसेविका जयश्री लोहकरे, वैशाली पवार व संजीवनी गोडसे यांनी नागरिकांच्या आरोग्य तपासण्या व्यवस्थितरीत्या पार पाडल्या.
तसेच योगेश्वर बहुउद्देशीय संस्था, बीड यांच्या वतीने लिंक वर्कर कमल इंगळे मॅडम व अकलूजचे टेक्निशियन भोसले सर यांचे विशेष सहकार्य लाभले.
हे आरोग्य शिबिर यशस्वी करण्यासाठी भाजप युवा मोर्चाचे सरचिटणीस विनोद थिटे, मेजर नवनाथ पवार, आबा पवार, देवा पवार, वासुदेव पवार व मनोज सोनवणे यांनी परिश्रम घेतले.
